2 amigo ni Joavan gidakop

CEBU, Philippines - Duha ka lalaking giingong mga amigo ni Joavan Fernandez ang gisikop human nakuhaan og high-powered firearms, mga bala ug illegal nga drugas niadtong Martes sa hapon diha sa sitio Hawod barangay Bulacao, dakbayan sa Talisay.

Ang mga nasikop mao si Manolito Jasmen Sencil, 35, ug Romy Rames alyas “Dodong”, 28. Sumala pa nga nakuhaan si Sencil og usa ka kalibre .45 nga pistola, mga bala niini.

Samtang si Rames nakuhaan usab og usa ka kalibre .45 nga pistola, usa ka silencer, usa ka kalibre .38 nga revolver, usa ka Colt AR 15 Rifle nga kalibre .9mm, ug mga magazines ug mga bala uban sa bag nga giingong dunay sulod nga usa ka dakong pakete sa shabu.

 Ang duha gikatakdang pasakaan og kasong paghupot og ginadiling drugas, illegal possession of firearms ug Comelec gun ban.  Ang grupo nila ni Supt. Pablo Labra ug Chief Inspector George Ylanan sa Regional Special Operation Group-Regional Intelligence Division (RSOG-RID)-7  ug Talisay police pinangulohan ni Supt. Elmer Lim ang misikop sa mga suspetsado.

Si Rames mihimakak nga iyaha ang mga armas ug ilegal nga drugas. (BANAT NEWS)