Loan officer gitulis gipatay

CEBU, Philippines - Patay ang usa ka babayeng loan officer sa usa ka lending firm nga gitulis ug gipusil sa  wala hiilhing lalaki gikan sa pag-withdraw niini og kwarta sa usa ka bangko sa  usa ka dakong mall sa dalan A.S. Fortuna sa barangay Bakilid, dakbayan sa Mandaue alas-10 pasado ang takna kagahapon sa buntag.

Ang biktima mao si Lyriza Amar, 24, dalaga nga lumad nga taga Bacolod ug nagtrabaho sa ZFA Financial System nga nahimutang sa dalan M.C. Briones sa dakbayan sa Mandaue.

Si SPO3 Marcos Noval, imbestigador sa Investigation Detection and Management Bureau (IDMB) sa Mandaue City Police Office (MCPO) nga nahinabi sa Banat News miingon nga gikan pa nag-withdraw og kwarta sa bangko. Ang biktima milakaw gikan sa mall paingon sa dalan A.S. Fortuna dala ang bag nga gisudlan og P100,000 dihang gisugat sa usa ka wala mailhing lalaki ug giilog ang dala niining bag apan nakigbinunlotay kini sa tulisan.

Tungod niini, miibot sa armas ang lalaki ug gidul-itan sa pagpusil ang dughan sa biktima ug daling gikuha ang bag ug midagan. Pag-abot sa unahan giilog sa tulisan ang motorsiklo ni Felicisimo Alcoseba nga taga barangay Pulpogan sa lungsod sa Consolacion ug gisakyan kini sa pag-ikyas. Na-recover ang motor sa Sudlon, Maguikay sa maong dakbayan apan wala na diha ang tulisan. (BANAT NEWS)