Bridge repairs hunongon tungod sa kadaugan sa Mactan

CEBU, Philippines - Hunungon sa kontraktor ang pag-ayo sa Marcelo Fernan Bridge karong Abril 26 ug 27  aron dili mosamot kahuot ang dagan sa trapiko sa habig sa dakbayan sa Lapu-lapu nunot sa kalihukan sa ika-492 nga sumad sa Kadaugan sa Mactan.

Atol sa niaging tigum sa Metro Cebu Bridge Management Board, si Frank Brazil, ang hepe sa traffic division sa dakbayan sa Lapu-Lapu, nihangyo sa PLD Construction nga hunungon una ang pag-ayo sa taytayan sa maong petsa.

Gipasabot ni Brazil nga ilang sirad-an ang dalan M.L. Quezon gikan sa eskina sa Marcelo Fernan Bridge hangtud sa unang taytayan nga karon gitawag na og Serging Osmeña Bridge alang sa Kadaugan street party.

Daghan kalihukan sama sa variety shows, disko, kaon ug inom atol sa duha ka adlaw nga kalihukan.

Si Engr. Paul Dy, ang operations manager sa PLD Construction, nisugot sa hangyo ni Brazil.

Gani sa pagkakaron walo ka oras na lang ang trabaho sa taytayan sugod sa alas-10 sa gabii hangtud sa alas 6 sa buntag imbis nga 24 oras.

Gipasalig ni Dy nga mahuman sa daling panahon ang pag-ayo sa taytayan bisan og duna nay lugway ang pag-ayo niini.

Gihangyo usab ni Dy si Brazil nga tugtan ang ilang mga trak nga makaagi sa kadalanan sa dakbayan sa Lapu-lapu sulod sa oras nga kini gi-ban.

Nagpadayon ang pag-ayo sa taytayan pinaagi sa pag-aspalto niini ug pag-ayo sa expansion joints balor og P27 milyones.

Dili hinuon grabe ang kahinay sa dagan sa trapiko sa lugar sukad giayo ang taytayan gumikan sa giingong maayong pagkaplano niini.

Gipasalig hinuon ni Assistant District Engineer Renault Ricardo sa Department of Public Works and Highways-7 nga mahuman nila ang maong repairs sa dili pa magsugod ang eleksyon sa Mayo 13. (BANAT NEWS)