Lola nadasmagan sa motor namatay

CEBU, Philippines - Patay ang usa ka 83 anyos nga lola human kini dasmagi   sa  usa ka  motorsiklo sa iyang paglabang sa karsada didto sa Sitio Cantakuyan, barangay Bongon sa lungsod sa Tabuelan niadtong Domingo sa alas 4:40 sa hapon. Ang biktima  mao si Tarcela Comiros, 83 , minyo, ug molupyo sa Sityo Kamansi, sa lungsod sa Sogod.

Samtang ang nakadasmag  kaniya mao si Cirilo Ursal Jr., 33, minyo, nga  taga   sitio Kampatok,  barangay Dalid Tabuelan ug usa ka   drayber  sa  habal -habal.

Si PO3 Philip Atazo sa Tabuelan Police  Station  mibutyag  sa Banat News  nga ang biktima naglakaw  daplin sa karsada samtang ang  motorsiklo  nga nagsunod  kaniya  milihay  sa gikasugat nga sakyanan.

Apan  sa iyang  paglikay  wala  niya  mabantayi ang  biktima  nga  kalit  nga  milabang  sa karsada  niadtong  higayona.

Nalamba sa sementadong  karsada  ang  biktima  ug  maayong  pagkapantok  sa ulo  niini  hinungdan  nga  nakuyapan.

Dali  nga  gihatod  ngadto  sa   Tuburan District Hospital   ug gibalhin usab  dayon  sa tambalanan  sa dakbayan sa Sugbo   diin kini ideklarar   nga patay na sa pag-abot sa hospital  sa kagamhanan. Ang  drayber  gipangita  pa  sa kapolisan.  (BANAT NEWS)