Driver sa goberno gibuko-buko pagpusil

CEBU, Philippines - Kritikal ang kahimtang sa drayber sa munisipyo sa lungsod sa Argao human kini pusila sa duha  ka   wala  hiilhing  mga lalaki  nga   nagsakay   og  motorsiklo  didto  sa barangay Tumagwan, lungsod sa Argao niadtong Domingo sa alas 12:30 sa udto.

Ang biktima mao si  Eddie Mansaradis,42, minyo, drayber sa munisipyo sa lungsod ug molupyo sa barangay Cudlong, sa maong  lungsod.

Si PO2 Alexander Lerio sa Argao Police Station, mibutyag  sa Banat News   nga ang biktima naglingkod- lingkod  sa  daplin  sa karsada   dihang  kalit   nga  miabot  ang  usa  ka motorsiklo  nga  gisakyan  sa duha  ka wala  hiilhing  lalaki.

Ang  biktima  wala  makabantay  dihang  nanaug  ang  nag-angkas  sa luyo  ug  sa walay  igong  hinungdan  giluthang   ang  biktima  nga nagtalikod.

Apan bisan og samaron nakadagan pa  ang  biktima ug didto   motago  sa  kapilya sa maong lugar  ug  wala  na  siya  hikit-i  sa  kriminal   busa  wa  siya  masegundahi  pagpusil.

Ang kapolisan nakapunit   og kabhang sa bala ug buhi  nga  mga  bala   sa kalibre .45   nga  pistola  sa  dapit  nga  nahitaboan.

Ang biktima gihatud dayon sa tambalanan  sa dakbayan sa Sugbo ubos  sa talandugong kahimtang. 

Gisusi pa  sa  kapolisan ang motibo sa krimen samtang  gipangita  pa  ang  kriminal. (BANAT NEWS)