Joavan, Greco gipangkasohan

CEBU, Philippines - Kasong frustrated murder ang gipasaka nga kaso kagahapong adlawa atubangan sa Talisay City prosecutor's office batok kang Joavan Fernandez, ang kontrobersyal nga adopted son ni Talisay City Mayor Socrates Fernandez, human siya gipasanginlang namusil sa usa ka car shop watchman diha sa South Road Property, San Isidro sa milabay'ng semana.

Si Talisay City police chief Supt. Elmer Lim kusganong mibarog sa iyang pamahayag nga si Mayor Fernandez mitawag ug mi-text kaniya nga iyang i-surrender ang iyang anak kagahapon.

"He called me and texted me that he will surrender his son on Monday. Naabtan na lang mi og udto, wala'y Mayor Soc ug Joavan nga nagpakita sa police station aron mo-surrender," matud pa ni Lim kinsa nahinabi sa tigbalita kagahapong adlawa.

Ang biktima mao si Eduardo Largo Jr., 36, taga sitio Isla Verde sa nahisgutang barangay ug tigbantay sa Danryan Marketing, usa ka car shop sa lugar.

 Si Largo nakaangkon og samad pinusilan sa ibabaw’ng bahin sa tuong bukton.Matud pa ni Lim nga padayon ang manhunt operation batok kang Joavan.

"Padayon ang atong pagpangita kaniya. We are calling the public to inform and report to the police if inyong ma-spot si Joavan. Sa iyang gisak-an karon, pagbantay mo kay basin kamo maapil sa kaso," bahad pa ni Lim.

Sa pikas nga bahin, si Mayor Fernandez dali nga midepensa sa iyang anak ug miingon nga atol sa pagkahitabo mi-check in  sa Queensland Hotel sa barangay Mohon ang anak ug buntag na kini migawas. Samtang gipasakaan na og kasong illegal possession of illegal drugs ug drug paraphernalia si Leodegreco Sanchez, ang anak ni kanhi bise gobernador Gregorio Sanchez kinsa gipadakop sa igsuong si Grecilda “Gigi” Sanchez-Zaballero.

Si Greco nadakpan sa mga sakop sa Regional Special Operations Group-7 pinangulohan ni PO3 Roy Veloso sa dalan Tres Borces sa Sindulan sa barangay Mabolo ning dakbayan niadtong Biyernes sa gabii human gialarma tungod sa pasangil nga pagkawat niini sa ilang yate gikan sa Liloan ug gidala sa Cebu City.

Kauban sa gipasakaan og kaso ni Greco mao ang iyang higalang si Edward Teves, kinsa giingong nakuhaan og usa ka gamay nga paketeng shabu. Si Greco gipasanginlang nakuhaan usab og dakong pakete sa gidudahang shabu atol sa pagkadakop sa duha.

Ang state prosecutor nga si Ruso Zaragoza mirekomendar og P200,000 nga piyansa matag usa sa duha sa illegal possession of illegal drugs ug P40,000 sa drug paraphernalia.

Ang igsuon ni Greco nga si Zaballero sa report sa Balitang Bisdak sa GMA News sa gipadalang text niini sa maong TV station kagahapon miklaro nga iyang gipadakop ang igsuon aron ibalik kini sa rehabilitation center.  (BANAT NEWS)