MCDCB ug RDC motutok sa problema sa trapiko
CEBU, Philippines - Ang pagsulbad sa problema sa trapiko sa Metro Cebu ang nag-unang proyekto sa Metro Cebu Development and Coordinating Board (MCDCB) nga giduso sa Central Visayas Regional Development Council (RDC).
Ang RDC executive committee niaprobar sa rekomendasyon sa Infrastructure Development Committee nga nag-endorso sa mga proyekto nga giila sa MCDCB.
Upat ka proyekto nga kadalanan ang giilang dinalian kaayo alang sa pagtubag sa problema sa trapiko ug mapadali ang biyahe sa mga motorista sa Metro Cebu.
Kini ang 18 kilometros nga gitawag og outer Cebu circumferential road ug distributer roads gikan sa Pardo hangtud sa Talamban, dakbayan sa Sugbo balor P2.7 bilyones; 5.4 kilometros sa dalan H. Cortes sa dakbayan sa Mandaue balor og P474 milyones ug ang unom ka kilometros nga Cebu North Coastal Road gikan sa Tayud, Consolacion hangtud Liloan balor og P150 milyones.
Apil sa maong proyekto ang pag-ayo sa drainage nga mosulbad usab sa problema sa pagbaha sa Metro Cebu.
Gitinguha usab nga mapalapdan ang mga eskina sa sa Poblacion, Minglanilla (P40 milyones); Juan Luna – MJ Cuenco Intersection (P80 milyones); Juan Luna-Cardinal Rosales Intersection (P80 milyones); Cebu North Road – UN Avenue Intersection (P150 milyones); UN Avenue-Plaridel St. Intersection (P50 milyones); AC Cortes Ave.-Plaridel St. Intersection (P50 milyones); ug Mactan Circumferential Road-Pajo-Basak, Marigondon Road (P100 milyones).
Ang pagpalapad sa kadalanan sa Minglanilla hangtud dakbayan sa Carcar (P180 milyones); ug Pajo-Basak, Marigondon Road (P200 milyones). Butangan usab og mga traffic signals ang mga eskina gikan sa SRP Tunnel hangtud sa Cebu International Port balor og P75 milyones.
Sementohon usab ang mga bahin sa V. Rama-B. Rodriguez-N. Bacalso (P10 milyones); Arch. Reyes Ave. (P50 milyones), F. Sotto St. (P50 milyones) ug V. Sotto St. (P25 milyones), sa dakbayan sa Sugbo. (BANAT NEWS)
- Latest
