Mag-uuma og lubi gisaaran og kaayohan

CEBU, Philippines - Subling musalmot sa  eleksiyon karong  Mayo ang Cocofed Partylist sa tumong ug tuyo nga mapalambo ang  maayong  programa  nga  makatabang  sa paglambo  sa  mga  mag-uuma  og  lubi  sa nasud.

Ang number 1 nominee nga si kanhi Kong. Emerito Calderon kinsa kasamtangang Association of Barangay Council (ABC) President sa lungsod sa Samboan kagahapon  mitataw nga kun subli silang kahatagan og luna sa kongreso iyang paningkamotan nga makakuha og dakung pundo sa coco levy fund alang sa pagpatuman og mga maayong programa sa mga mag-uuma.

Gitumbok ni Calderon ang pagpalig-on sa expanded scholarship program matag lungsod  sa tibuok nasud alang sa mga anak sa mga mag-uuma  sa 70 ka probinsya nga nasakop sa Cocofed.

Dugang ni Calderon nga apil sa iyang plano ang pagpalapad sa life insurance gikan sa tag P10 mil  matag miyembro ngadto  na  sa tag-P50 mil nga  insurance benefits sa matag miyembro. Laing programa sa Cocofed mao ang pag-supply og libreng  abuno sa mga mag-uuma og  lubi nga miyembro niini ingon man ang pagpatuman sa re- planting sa mga high breed nga binhi  sa lubi.

Ang 2nd nominee sa Cocofed mao sila si Charlie Avila, ang nagtukod  sa Small Farmers Association   samtang   ang  ika-3rd nominee mao  si Efren Villacenor, ang presidente sa Southern Luzon Farmers Organization ug director  usab sa United Coconut Planters Bank. (Darrel A. Carumba/WC) (BANAT NEWS)