Programa sa SK Basak Mandaue alang sa Senior Citizens gipaluyohan ni Sec. Mar Roxas
CEBU, Philippines - Nasayran gikan ni SK Chairwoman Alyssa Tenchavez sa Basak, Mandaue City, nga ang ilang programa sa mga batan-on sa Basak, Mandaue City, alang sa mga senior citizens gipaluyohan ni Secretary Mar Roxas sa Department of Interior & Local Government (DILG).
Matud ni Tenchavez iyang nadawat ang sulat gikan sa DILG-Manila, pinaagi ni Director Manuel Gotic, OIC sa Bureau of Local Government Supervision nga nagpahibalo sa hingpit nga pagpaluyo sa DILG sa sugyot sa SK Basak Mandaue City pagmugna ug paglusad sa programa pagpili og ‘Most Outstanding Senior Citizens Organization," ug individual award for "Most Outstanding Senior Citizen."
Hinumdoman nga niadtong Disyembre 1, 2012, ang Sangguniang Kabataan sa Basak, Mandaue mipalabang sa SK Resolution No. 34 naghangyo kanila ni Brgy. Kagawad Honey Mabanto, chairwoman sa committee on senior citizens affair; Ben Gahi, regional president sa Federation of Senior Citizens Associations of the Philippines, Inc (FSCAP); ug City Councilor Jose Jefferson Ceniza, chairman sa senior citizens affair sa dakbayan, pagmugna sa nahisgutang programa alang sa mga senior citizens.
Si Tenchavez mipadala og sulat-hangyo ngadto kang Secretary Roxas alang ning maong katuyoan.
Sa iyang sulat, giawhag ni Director Gotiz si Tenchavez pagpanday sa labing daling panahon, sa framework nga maoy mahimong guideline ug criteria nga mao unyay mahimong basihan pagpili sa Most Outstanding Senior Citizens Organization ug Most Outstanding Individual Senior Citizen, dili lamang sa Basak Mandaue, kundili tibuok nasud.
Maoy gilantaw ni Tenchavez nga ma-institutionalize kining maong programa pinaagi sa pagpalabang sa usa ka balaud sa Kongreso nga himoon na kini nga usa ka tinuig nga tulomanon.
Tipik lamang kini sa mga panglantaw ni Tenchavez alang sa mga senior citizens pag-ila ug pagpasalamat sa ilang mga nahimo ug natampo sa kalamboan sa nasud. (BANAT NEWS)
- Latest
