Naningil sa bayad sa giprendang TV gipusil

CEBU, Philippines - Usa ka lalaki nga naningil sa kulang sa bayad sa giprenda niyang telebisyon ang gipusil sa duha ka wala mailhing mga lalaki kagahapon sa kaadlawon diha sa dalan Jakosalem sa barangay Kamagayan ning dakbayan sa Sugbu.

Ang biktima giila nga si Ornildo Pansa y Cabahug, 31, construction worker ug lumulupyo sa Sitio Kalapukan, sa Carreta ning siyudad.

Base sa pasiunang imbestigasyon ni SPO4 Rey Cuyos sa Homicide Section, nagkuyog ang biktima ug higalang naila lang sa mga pangalang "Ryan" diha sa balay sa usa ka ginganlan og "Kulot" diha sa nahitaboan aron paninglon sa balanse niini sa giprenda niyang telebisyon.

Apan samtang naglakaw na pauli, duha ka wala mailhing tawo nga nagsakay og motorsiklo ang kalit nga miabot ug ang usa mipusil sa biktima diha sa ubos nga bahin sa iyang lawas.

Ang mga gikatahapan daling miikyas palayo sa lugar samtang gidala sa Cebu City Medical Center ang biktima sa mga sakop sa Mobile Patrol Group pinangulohan ni PO2 Jonathan Baquiler. Wala pa masuta sa kapolisan ang motibo sa krimen samtang usa ka basiyo sa bala sa 9mm caliber ang nakuha diha sa crime scene. (Genevieve G. Dejito/EIM) (BANAT NEWS)