80-anyos miapas sa namatay nga igsuon

CEBU, Philippines - Miapas ngadto sa kamatayon ang 80- anyos nga lolo kinsa gikan nga mitambong sa haya sa namatay niining igsoon human kini nadasmagan og motorsiklo atol sa iyang paglabang sa dalan diha sa eskina Katita, barangay Yati sa lungsod sa Liloan niadtong Miyerkules sa alas 6:50 sa gabii.

Patay nang nadangat sa tambalanan si Emiliano Cortes, byudo ug molupyo sa sitio Pilapilan sa maong barangay, samtang ang nakadasmag kaniya mao si Jason Sentillas Batad, 26, taga barangay Tawason sa siyudad sa Mandaue.

Matud ni SPO1 Claudio Castro Jr. traffic investigator sa Liloan Police dihang nahinabi sa Banat News paingon na untang mopauli gikan sa haya sa igsuon ang biktima dihang kini nadasmagan.

Sumala pa nga kusog kaayo ang dagan sa motorsiklo nga padung sa siyudad sa Mandaue ug wala na makabantay sa paglabang sa biktima.

Tungod sa pagdasmag nalamba usab ang motorsiklo ug ang duha daling gidala sa tambalanan sa dakbayan sa Sugbo apan paglabay sa pipila ka gutlo namatay ang tiguwang. (Darrel A. Carumba/EIM) (BANAT NEWS)