OFW sa Saudi gipahimangnoan sa DOLE

CEBU, Philippines - Ang Department of Labor and Employment (DOLE) miaghat sa mga ilegal ug dili dokumentadong Overseas Filipino Workers (OFWs) sa Saudi Arabia nga tarongon na ang ilang mga dokumento karong gihunong na ang crackdown operations sa mga ilegal nga migrants didto.

Matud pa ni DOLE Secretary Rosalinda Baldoz, maayong higayon ang gi-anunsyong tulo ka buwan nga lugway sa hari sa Saudi sa paggukod sa mga illegal worker aron tarungon sa mga Pinoy ang ilang mga papeles.

Gitambagan usab ni Baldoz ang mga Filipino nga milapas na sa ilang pagpuyo didto sa Saudi nga posibleng nagkaproblema na ang mga papeles niini ug nga kinahanglan na usab nga ilang lihokon ang  maong mga dokumento.

Kini human sa pasidaan nga sikopon ug ipa-deport ang mga ilegal nga trabahante sa Saudi ubos sa Saudization program niini nga nagtinguhang dugangan ang gidaghanon sa Saudi nationals nga malakip sa workforce niini partikular na sa pribadong sektor.

Sa pagkakaron, 10-porsyento lamang sa workforce sa nasud ang Saudi nationals diin mogawas nga sa matag 10 ka Saudis nga nagtrabaho, siyam niini ang naa sa pampublikong sektor.

Gipahayag ni Baldoz nga sa pagkakaron, dili pa siya sigurado sa hustong gidaghanon sa mga dili dokumentadong Pinoy sa Saudi ug giingong ang Department of Foreign Affairs (DFA) ang posibleng may gigunitang rekord niini. Sa Central Visayas giawhag usab ni DOLE Regional Executive Director Ma. Gloria Tango ang mga Pinoy nga nanginabuhi o kasamtangang manginabuhi pa ngadto sa Saudi sa pag-inspeksyon gayud sa ilang mga dokumento aron dili usab sila makasinati og problema sa legalidad sa ilang mga dokumento.

Gibutyag ni Tango nga kinahanglang limpyo gayud ang pamaagi sa pagproseso sa mga nanarbaho didto sa Saudi sa ilang dokumento o papeles subay sa gihangyo sa hari sa Saudi. (BANAT NEWS)