Gullas mi-warning ni Joavan

CEBU, Philippines - Gipasidan-an ni Kongresista Eduardo Gullas  sa unang  distrito sa Sugbo  nga higpit  niyang  ipatuman  ang  balaod  bahin  sa  mga kasong giatubang  ni Joavan Fernandez, anak  ni  Mayor Socrates Fernandez  sa dakbayan sa Talisay    kun modaug  siya  sa pagka-mayor karong Mayo 13  nga  piniliay.

Ang   maong  pasidaan  gipalanog  ni Gullas  atol  sa  Candidates  Fora 2013  nga gipahigayon didto sa Cebu Cultural Center (CCC), sa barangay Lahug   ning  siyudad sa Sugbo  kagahapon.

Matud pa ni Gullas, giestudyohan niya ang balaud sulod sa upat ka tuig busa walay  bisan kinsa ang  molabaw sa balaod ug andam siyang mandaran ang kapolisan  sa  Talisay nga ipatuman  gayud ang balaud   sa walay  pagpinig.

Ang maong tigom gihimo  alang sa mga nagkalain-laing kandidato pagka-mayor sa unang distrito sa Cebu.

Lakip nga  mitambong  ang mga kandidato pagka-Mayor sa dakbayan sa Carcar nga si Mayor Nicepuro Lauron Apura, Mayor Lakambini Reluya  sa lungsod sa San Fernando ug   uban  pa.

Tuyo  usab sa maong forum nga  kahatagan  og  solusyon  sa mga kandidato ang mga nagkalain-laing  problema sa Cebu sama sa trapiko, peace and order, kakabus, drugs, environment, basura, culture and heritage ,ug uban pa.

Sa pito ka lungsod  sa  unang distrito, upat ra ka kandidato sa pagka-mayor ang   nakatambong

Ang sunod nga forum  alang sa ika-upat  ug  ika-lima  nga  distrito  ipahigayon unya sa Abril 19 sa University of the Philippines ug ang ika-duha  ug  ika-tulo nga distrito  wala  pa  katakdai  og  petsa. (BANAT NEWS)