Soco gidugok sa mga mananagat

CEBU, Philippines - Kaliboan  ka  mga  tawo  nga naglabi  sa  mga  mananagat ang  midugok  kang  vice  gubernatorial  candidate  Glenn Soco  sa lalawigan  sa Sugbo  sa iyang  tulo  ka adlaw  nga  paglibot  sa  amihanang  bahin  sa lalawigan  sa miaging  adlaw.

Didto  sa barangay  Manio   sa  lungsod  sa San Remegio  gihimamat  ni  Soco  ang  mga  mananagat kinsa  mahinangpon  kaayong  nagpaabot  sa  pagduaw  niya  didto  sa maong  lugar.

Dayon  miadto  siya  sa barangay  Looc, Punta, Argawanon, Kayam, Siocon, Nailon, Hagnaya, Lawis  ug  Camobo-on, tanan   sakop  sa ika-upat  nga distrito  sa lalawigan  sa Sugbo  diin  gidawat  si  Soco  nga  mahinangpon  kaayo  sa mga  katawhan.

Si  Soco kinsa  usa  ka  independenting  kandidato  sa  pagka-bise  gobernador  nagtuo  nga  walay  laing  makatabang  sa  mga  katawhan   sa maong  mga  lugar  gawas  kaniya.

Kini  tungod  kay  base  sa gitug-an  kaniya  sa   mga  molupyo  nga  iyang  nahimamat  nga  wala  pay  mga  politiko  nga  ilang  nahimamat  nga  mitubag  sa ilang  panginahanglan.

Matud  pa  ni Soco  nga  ang  trabaho  ug  ginagmay  nga negosyo  maoy  gipangandoy  sa  mga  gikahibalag  niyang  mga  suporter  kinsa  nagpaabot  sa iyang  pagduaw    sa  mga  lugar  nga  nahisgutan  na.

Ang  kalisud  sa ilang  kahimtang  sa pagpuyo  nagkinahanglan  nga  katabangan  ug  mao  usab  kini  ang  gipunting  sa  iyang  mga  plano  kun  ugaling  buligan  siya  nga  makatungtong  sa Kapitolyo  human sa piniliay  sa Mayo 13. Matud  pa  ni  Soco  nga  ang maong  panginahanglan  misakar  usab  kaayo  sa iyang  mga  programa  sama  sa paghatag  og  ginagmay  nga negosyo  sa katawhan  ilabi  na  sa mga  ginang  sa panimalay.

Ikaduha  mao  ang  paghatag  og  trabaho  niadtong  mga walay  trabaho  tungod  kay  aduna siyay  ikasarang  niini  ilabi  na  nga  may   buhatan  siya  nga  motabang  sa  mga walay  trabaho.

Tungod  usab  sa kasayoran  sa katawhan  sa  mga  kalungsoran  ug  kabarangayan  sa habagatan  ug  amihanang  bahin sa lalawigan  sa iyang  abilidad  sa  paghatag  og  kaharuhay  sa panginabuhi s a katawhan,  giisip  sa  mga  katawhan  nga  naduaw  ni Soco,  nga  siya  usa ka  manluluwas  kanila. Matud  pa  sa  mga  mananagat  nga  ang  tawo  ug  politiko  sama  kang  Soco  maoy  tunolan  nila  sa ilang  walay  kinutbanan  nga  suporta  gumikan sa kaligdong  niini  nga  angayan  kaayong  piyalan  og  dakong  tahas  sa lalawigan.  (BANAT NEWS)