P6 mil nasakiyo sa tulisan gikan sa bakery

CEBU, Philippines - Mikabat  sa P6 mil kapin  ang  nasakiyo  sa  nag-inusarang tulisan   nga mitulis  sa usa  ka  panaderiya sa  Banawa, barangay Guadalupe  kagahapon   pasado alas 3:00 sa kaadlawon.

Ang biktima mao ang kahera nga si Hermia Arnado, 18, ug panadero  nga si Adrian Aventurado, 21, pulos    molupyo sa maong dapit.

Matud pa ni Arnado nga ang tulisan  nagpakaaron ingnon  nga  mopalit  og  pan, apan  nakurat  na lang  siya  dihang  pagtunol  niya  sa  duha  ka  Spanish bread sumbohan  sa armas  ang  gition kaniya  imbis  kuwarta uban  sa pagdeklarar   nga tulis.

Dayon  mimandar  kini  nga  paablihan  ang  pultahan  kay  mosulod  siya  ug  gimandoan  silang  duha  si Aventurado  sa  pagpaduko  sa ilang  ulo  samtang  gitionan  sila og  armas .

Dayon  giablihan  niini  ang  kaha   nga  gibutangan  sa halin  sa tindahan  ug  gipupho  sa  tulisan  ang  P5 mil  nga  sulod  niini.

Apan  sa paggawas niini giapil  pa  sa pagdala  ang  P1,400  nga iya  sa kahera.

Walay  nahimo  ang  mga  biktima  gawas  sa pagpahibawo  sa kapolisan  ug  gimandaran  sila  sa mga  polis  nga  magpataud  sila  og camera  aron  mailhan  ang  kinsa  mang  tulisan  nga manulis  sa  ilang tindahan  sa sunod  higayon. (BANAT NEWS)