Byuda samdan sa ulo namatay sa kawayanan

CEBU, Philippines -  Patay nang nakit-an  ang usa  ka 77 anyos nga byuda    sa ilawom sa kawayanan  gikang mitambong og political rally didto sa Sitio Kalubihan barangay Maalat lungsod sa Madredijos isla sa Bantayan kagahapon sa alas 6:45 sa buntag.

Ang napalgang patay mao si Amparo Canillo, 77, byuda, nga  taga   barangay Bunacan,  Madredijos.

Si PO2 Erik Illustrisimo sa Madredijos Police  Station   nagkanayon nga  ang mga kabanay  sa  biktima mitug-an  nga  gikan  sa   political rally sa mga  kandidato  sa United Nationalist Alliance (UNA).

Unya  pag-uli niini  sa balay,  taud-taud  migawas apan wala  na  kini  mahiuli  nga  nakapabalaka  sa  iyang  mga  anak.

Kagahapon sa buntag na nila kini   hikit-i nga patay  na  nga naghayang   ilawom sa kawayanan  duol  sa ilang  balay.

Ang municipal health officer sa lungsod sa Sta. Fe nga si Dr. Rowena Manalili mitataw nga ang samad sa luyong bahin sa ulo sa biktima maoy nakaingon sa hinanali niining kamatayon.

Apan gisusi pa  sa kapolisan kun wala bay foul play   ang  iyang  kamatayon o  kaha  napantok lang  sa bato  ang  ulo  dihang nadakin-as ug natumba  hangtud  nga  namatay. (BANAT NEWS)