Negros Or. gipailawom watchlist

DUMAGUETE CITY, Philippines  --- Gibutang ilawom sa watchlist area ang tibuok lalawigan sa Negros Oriental  nunot niining nagsingabot nga eleksyon, samtang tulo ka private armed groups (PAGs), duha niini sa north  ug usa sa south ang gi-monitor karon sa kapolisan.

Matud pa ni Police Regional Office-7 director, Chief Supt, Marcelo Garbo,Jr. gibutang sa watchlist ang lalawigan human sa usa ka adlaw nga security briefing sa police,  military, Comelec ug mga magtutudlo.

Sumala pa ni Garbo ang workshop, gihimo aron masiguro nga malinawon ang umaabot nga piniliay sa Central Visayas.

Dugang pa ni Garbo ang Negros Oriental duna nay kasaysayan sa mga kagubot ug kasamok panahon sa piniliay sa kadaghanan sa mga kalungsoran sa maong probinsya ug ang presensya sa mga rebeldeng New Peoples Army.

Giklaro hinuon ni Garbo nga madala pa sa kapolisan ang pagmentinar sa kahapsay ug kalinaw sa maong probinsya, ug ang pagpailawom niini sa watchlist usa lang ka paagi aron mapangitaan sa kapolisan og solusyon ang mga problema ug dili magkompiyansa.

Sumala pa ni Supt. Pablo Labra, hepe sa PRO-7 Intelligence Division, dunay napulo ka PAGs nga gi-monitor karon sa Central Visayas. Samtang si Negros Oriental Police provincial director, Sr. Supt. Noli Romana, miingon nga duna na silay gihimong pangandam , apan ang workshop gitumong  aron tukion ug makita ang mga posibleng problemang motumaw. (/EIM) (BANAT NEWS)