Concrete road barriers ipatangtang ni Rama

CEBU, Philippines - Gihulagway ni Mayor Michael Rama nga nasayop ang Department of Public Works and Highways (DPWH) sa pagbutang og kongkretong road-divider taliwala sa mga flyover dinhi sa dakbayan.

Atul sa tigum sa mga sakop sa Executive Committee sa Regional Development Council (RDC) kagahapon, giawhag ni Rama ang kadagkoan sa DPWH nga kuhaon gikan sa flyover ang maong mga sementado nga road dividers.

Matud ni Rama nga imbes makapugong og mga aksidente ang pagbutang sa maong mga “road barriers” makamugna na hinuon kini og aksidente, ilabi na sa lawom nga gabii ngadto na sa kaadlawon.

Si DPWH District Engineer Nicomedes Leonor mipasabot nga ang maong mga road dividers gibutangan nila og mga “reflectors” aron makita dayon kini sa mga motorista panahon sa gabii.

Gibutang ang maong mga road dividers taliwala sa flyover aron dili maglumbaanay ang mga sakyanan. Gitataw ni Leonor nga ang kadagkoan sa City Traffic Operations Management (CITOM) ang miawhag kaniadto nga ang flyover butangan sa maong mga reflectorized road barriers.

Matud ni Rama nga kun magdiki-diki ang DPWH sa pagkuha sa maong mga sementado nga road barriers, siya maoy mopakuha niini pinaagi sa mga kawani sa City Hall aron paglikay sa aksidente.

Ang mayor miingon nga husto ang tumong sa DPWH nga pagpugong nga maglumbaanay ang mga sakyanan inig-agi nila sa flyover, apan sayop nga semento ang gamiton.

Matud ni Rama nga panahon sa kaadlawon kusog mopadagan ang mga motorista ug kun maligsan kining maong mga semento hayan nga mabalintong ang mga sakyanan. (BANAT NEWS)