Tribu Basakanon di na moapil sa Aliwan

CEBU, Philippines - Dili na mopadayon pagsalmot sa Aliwan Festival sa Manila ang mga sakop sa Tribu Lumad Basakanon karong Abril 13.

Ang pangulo sa Lumad Basakanon nga si Basak-San Nicolas Barangay Captain George Rama miingon nga gitawgan na niya ang mga tigpasiugda sa Aliwan Festival nga dili na sila moapil.

Ang rason sa dili na pag-apil sa Tribu Lumad Basakanon sa giisip nga “grandest festival” sa nasud mao ang kakuwang og salapi nga magamit sa pletihan ug sa pagkaon sa mga sakop.

Si Mayor Michael Rama namahayag nga gisuportahan niya ang baruganan sa iyang ig-agaw nga kapitan kay wala sila’y magasto alang sa maong kalihukan.

Subli nga gisaway sa mayor ang mga konsehal sa dakbayan nga mibabag sa paghatag og budget alang sa Tribu Lumad Basakanon nga unta magdala man kini sa ngalan sa dakbayan sa Sugbo.

Apan si Konsehal Margarita “Margot” Osmeña nga maoy pangulo sa Committee on Budget and Finance miingon nga gisunod lang nila ang lagda nga gikan sa Pagcor.

Matag buwan ang Pagcor naghatag og tulo ka milyon ka pesos ngadto sa dakbayan sa Sugbo isip bahin sa kita sa Pagcor tungod kay gitugotan kini nga maka-operate og gambling Casino sa dakbayan.

Matud ni Margot nga wala gyud maapil sa lagda nga gihimo sa Pagcor ang pagasto sa ilang donasyon alang sa cultural activities.  Apan gipasabot ni Margot nga kun ang Pagcor mohimo’g katin-awan nga mahimong gamiton ang Pagcor Funds alang sa cultural activities, ila kining tumanon sa konseho.

Gipasabot ni Margot nga bag-o kining guidelines sa Pagcor nga wala na maglakip sa cultural activities sa gastohan sa kwarta nga ilang gidonar sa mga dapit nga nag-operate sila og casino. (BANAT NEWS)