Peace covenant gipirmahan

CEBU, Philippines - Gipirmahan sa mga kandidato sa lungsod sa Cordova ang usa ka “Peace Covenant” nga gipasiugdahan sa kapolisan ug sa simbahang Katoliko sa maong lungsod kagahapon sa buntag.

Ang tulo ka mayoralty candidate ug mga independenteng kandidato maoy mipirma sa maong covenant alang sa hapsay ug malinawon nga pagpahigayon sa eleksiyon sa maong lungsod.

Ang mipirma mao sila si encumbent Mayor Atty. Adelino “Addy” Sitoy sa Liberal Party, Atty. Rodrigo Jumao-as sa One Cebu Party ug Johnson Tan Jr. sa Team K (usa ka independenteng partido) uban sa ilang mga konsehales .

Matud pa ni Cordova Police Station Chief P/CInsp. Alvin Balio   ug   ni Fr. Roman Alaan ang Kora Paroko sa San Roque Parish Church sa Cordova   nga nakahunahuna  sila  sa pagpatuman  sa maong peace covenant alang sa mga Cordovahanon kinsa  nangindahay  nga  unta  magmalinawon  ang  ilang  lungsod  sa umaabot  nga election.

Samtang si Mayor Sitoy mipadayag nga sila mismo maoy mag-monitor sa ilang tagsatagsa  ka  kampo nga dili makamugna og kagubot   sa adlaw mismo  sa piniliay.

Misugyot si Sitoy nga kuhaon niini ang mga numero sa mga cell phone sa iyang mga kaatbang pagka mayor aron dali ra ang ilang komunikasyon panahon nga dunay mga sakop niini nga magmugna og kagubot sa mga panahon sa       kampanya.

Ang maong sugyot ni Sitoy gihangop nila ni Atty. Jumao-as ug Tan lakip na  si CInsp. Balio  kinsa  buot usab makuha ang mga numero sa mga kandidato aron dali kini masayod sa mga binuhatan sa ilang mga dumadapig.

  Lakip sa milagda sa maong covenant mao  ang  mga kandidato pagkakonsehal nga sila si Paterno Siton, Edwin Menguito, Allan Tiro ug Riel Sanchez Inoc. (BANAT NEWS)