Duha ka bata nalumos

CEBU, Philippines - Duha ka mga bata ang nangalumos atol sa bakasyon niadtong Sabado de Gloria, mao na kini ang ikaduha ug ikaupat nga insidente sa pagkalumos sukad pa niadtong Biyernes Santo.

Usa ka 5-anyos nga batang lalaki ang nalumos sa dagat sa Sityo Tingtingon sa barangay Maricaban sa lungsod sa Sta. Fe sa isla sa Bantayan niadtong Sabado sa alas 1:00 sa hapon.

Ang biktima nga patay nang nahaw-as  gikan sa dagat mao si John Ivan Sinangote Esgana, 5, molupyo ra sa maong lugar.

Matud ni SPO1 Wainright Desabelle sa Sta. Fe Police dihang nahinabi sa Banat News kauban sa biktima ang iyang mga ginikanan ug ubang mga bata nangaligo sa dagat  tungod kay bakasyon man.

Apan way nakamatikod nga naabot ang bata sa lawom nga bahin sa dagat ug kalit lang nga nahanaw. Milanat pa og pipila ka oras una pa nakit-an ang bata nga milutaw na sa dagat dihang nabangalan kini sa usa ka mananagat nga si Brindo Pasenio, apan wala na kini panimuot.

Patay na kini pag-abot sa Bantayan District Hospital.      Samtang patay usab ang 8-anyos nga si Larry Agudo, taga-Barangay Kantuba-on sa lungsod sa Tabuelan dihang nahaw-as sa dagat sa Sitio Kamsinon, Barangay Olivo sa maong  lungsod alas-9 sa buntag niadtong Sabado.Si Agudo giingong uban sa iyang mga paryente ug 10-anyos nga igsuon niadtong higayuna nga nangaligo sa dagat sumala pa ni PO3 Gilbert Allego.

Matud pa nga si Agudo dili makamao molangoy ug giingong nadala sa sulog sa lawom nga bahin sa dagat nga maoy hinungdan sa pagkalumos niini. EIM)(BANAT NEWS)