Palma miawhag sa mga Sugbuanon nga ig-ampo nga ibayaw pagka-beato si Msgr. Teofilo Camomot
CEBU, Philippines - Giawhag usab ni Cebu Archbishop Jose Palma ang mga Filipino nga ig-ampo ang Carcaranon nga si Msgr. Teofilo Camomot nga ibayaw pagka-beato atol sa pagsaulog sa Easter Sunday mass kagahapon.
Si Camomot maoy giduso karon sa simbahan dinhi sa Pilipinas isip sumusunod nga santong Filipino uban nila ni San Lorenzo Ruiz ug San Pedro Calungsod.
Hinuon gipasabot ni Palma nga kinahanglang ig-ampo usab sa usa’g-usa ang kaugalingon aron magpuyo kining balaan.
“Pero ang akong punto kay dili lamang sila ang atong iampo aron mamahimong santos apan kitang tanan angay mag-ampo aron makabaton ug kinabuhing santos,†dugang pasabot pa ni Palma.
"Kuyog kita kang Maria sa pagsadya ug paglipay kay ang katapusang pulong dili mahitungod sa kamatayon apan sa kaluwasan," sumala pa ni Palma diha sa Santos nga Misa sa Cebu Metropolitan Cathedral.
Matud pa ni Palma, ang kasakit nga gibati ni Maria gikan sa pagdakop hangtud na sa paglansang sa krus kang Hesus susama sa mga pagsuway ug kalisod sa katawhan.
“Si Maria ang nagpadako ni Hesus. Pagkakita niya nga si Hesus gilansang sa Krus, midanguyngoy siya pag-ayo. Ang tanang inahan sama ni Maria mudanguyngoy gayud kung anaa sa ingon ana nga sitwasyon,†dugang pa sa Arsobispo.
Si Palma kinsa maoy presidente sa Catholic Bishops Conference of the Philippines (CBCP) wala malimot pag-komedya sa mga manimbahay sa pag-ingon.
“Now, I believe this is not necessary because everybody is smiling with the resurrection of Jesus Christ,†pasiaw pa niya.
Sa laing bahin, nagpunsisok ang gibanabanang 7,000 ka mga Katoliko diha sa Archdiocesan Shrine of Our Lady of Guadalupe alang sa “Sugat Sa Guadalupe†nga giapilan sa 180 ka mga kabataang nagdala og nagkalain-laing papel nga kinutlo sa Bibliya.
“Ang pagtoo kang Hesus ipatigbabaw kay mao kini ang instrumento sa kaluwasan sa kalag sa mga tawo. Ug ang pagtabang sa isig ka tawo maoy angayan nga ipatigbabaw karong Pasko sa Pagkabanhaw,†matud pa ni Msgr. Jose Montecillo, kura paroko sa maong simbahan atol sa iyang homiliya. EIM (BANAT NEWS)
- Latest
