Mga Katolikong simbahan higpit nga gibantayan

CEBU, Philippines - Higpit nga gibantayan sa kapolisan ang mga simbahan sa dakbayan sa Mandaue ug dakbayan sa Lapulapu nga sagad maoy tapukan sa daghang mga tawo sa Huwebes Santo ug Biyernes Santo nga mamalandong mga Romano Katoliko.

Si Senior Superintendent Petroneli Baldebrin nga maoy direktor sa kapolisan sa maong dakbayan mimando  usab  sa iyang  mga  sakop    nga dili mokumpiyansa  ilabi  na  sa barangay Centro   kay  daghang  manimbahay nga  magbilar  sa tibuok gabii   sa  pag-nobena ug pagrosaryo.

Ingon  usab  niini  ang himoon sa Presinto 5 nga nagbase sa barangay Opao  kay sakop usab   sa  ilang hurisdiksyon   ang Christ the King nga simbahan nga nahimutang sa barangay Alang-Alang sa maong dakbayan  diin  kasagaran  sa  mga  molupyo  di mangatulog  gikan  sa Huwebes  hangtud  sa  Domingo.

Ang Presinto 3 sa Mandaue City Police Office (MCPO) nga gipangulohan ni Senior Inspector Wilson Abot  higpit  usab  nga  mobantay  sa  Fatima  Church sa barangay Basak ug simbahan ni Senior Santo Nino sa maong  barangay.

Dugang simbahan nga higpit nga gibantayan sa kapolisan sa dakbayan sa Mandaue sa Huwebes ug Biyernes Santo mao ang simbaban   sa Getsemane sa barangay Casuntingan  sa maong dakbayan.

Samtang sa Presinto 2 sa barangay Subangdaku maoy mobantay  San Roque Church sa maong  lugar.

Mao usab ang gihimo ni Senior Superentindent  Rey Lyndon Lawas, director sa  Lapulapu City Police Office  sa paghatag og kasiguroan sa mga simbahang Katoliko sa  maong dakbayan.

Naglakip sa ilang bantayan mao ang simbahan sa Milagrosang Birhen sa Regla  sa barangay Poblacion, simbahan ni Santo Niño sa barangay Mactan ug ingon man ang simbahan sa barangay  Babag sa maong dakbayan. (BANAT NEWS)