Mga piniriso gipang-TB

CEBU, Philippines - Gikabalak-an  sa  mga  tinugyanan  sa prisohan  ang  pagdaghan  sa mga piniriso  nga  masakiton  og  tubercolusis (TB)  sa Cebu City  Jail (CCJ).

Si Jail Chief Superintendent Deogracias C. Tapayan.  Regional Director  sa Bureau of Jail  Management  and  Penology (BJMP) 7  mipadayag   sa maong  kabalaka  atol  sa Kapihan  sa PIA  didto  sa Sarosa International Hotel  sa  miaging  Lunes  nga  gipalanog  usab  sa DYMR  Radyo  ng  Bayan.

Matud  pa  ni  Tapayan  nga  nangayo  sila  og  tabang  sa  Department of Health (DOH)7  alang  sa  pagpatukod  og  buwag  nga selda  alang  sa  mga  masakiton  og  TB  nga  mga  piniriso.

Gibanabana  ni  Tapayan  nga  sa kaping  duha  ka  libo  ka  mga  piniriso  sa  CCJ  anaa  sa  25 porsento  ang  masakiton  og  TB  niini.

Gitumbok  niya  nga  usa  sa  mga  hinungdan  nga  nagmasakit  og  TB  ang  mga  piniriso mao ang  pagkahinigarilyo  niini.

Hinungdan  nga  higpit  na  niyang  gibalaod  ang  pagdili  sa pagpanigarilyo  sulod  sa prisohan.

Kaniadto  sa  wala  pa  idili  ni Tapayan   ang  sigarilyo,  daghan  kaayong  mga  vendor  ang  gawasnon  kaayong  mosulod  sa compound  sa CCJ  aron  mamaligya  og  sigarilyo.

Apan  karon  nga  gidili  na,  wala  nay  mga vendor  nga  makasulod  apan  namatngonan  niya  nga  may  mga  palusot  gihapon  nga  gihimo  ang  mga  piniriso  aron  sila  makabuhot  og  sigarilyo  sulod  sa ilang  selda.

  Kini gihimo  sa tago-tago  nga  paagi  sa  mga  piniriso  apan  ang  masakpan  nga  molapas s a balaod  sa prisohan  pahamtangan  og  silot  sumala  pa  ni Tapayan.

Laing  hinungdan  nga  gitumbok ni Tapayan  sa pagdagsang  sa  sakit  nga TB  sa  mga  piniriso  mao  ang  daan  na  silang  masakiton  sa   wala  pa  sila  mapaslak  sa prisohan.

Apan  usa  sa    suliran ni Tapayan   bahin  sa maong  sakit  mao  ang  kahasol  sa  mga tinugyanan  sa prisohan   sa panahon  nga  ipadoktor  nila  ang  masakiton  kay  nagkinahanglan  pa  og  court  order.

Hinuon  matud  pa niya  nga  wala  pay  mga  masakiton  og  TB  nga piniriso  nga namatay  sa sulod  sa prisohan  gumikan  sa maong  sakit.

Maglisud  na  usab  sila  pag-monitor  sa  masakiton  ilabi  na  kun  kini  makagawas  na  sa prisohan.

Ang  gipaniguro  lang  ni Tapayan  nga  gumikan sa abag  sa DOH7  makapatukod  sila  og  dugang  selda  nga  kabutangan  sa  mga masakiton  aron  dili  kini  makapanakod  sa  mga  wala  pay  sakit  nga  mga  priso. (BANAT NEWS)