Pag-unay sa duha ka polis Duha ka babaye gi-lie detector test

CEBU, Philippines - Duha ka mga tawo ang gipailawom sa lie detector test kagahapon diha sa National Bureau of Investigation-7 may kalambigitan sa nahitabong pag-unay og pinusilay sa duha ka mag-agaw nga polis niadtong Sabado sa gabii nga miresulta sa ilang kamatayon.

Ang gipaubos sa lie detector test mao sila si Natalie Apostol ug Victorina Saling kinsa giingong diha atol sa pagpinusilay nila ni PO1 Anthony Gonzales ug PO1 Rey Gabutan.

Samtang ang duha ka mga polis nga sila si PO3 Ariel Palanas ug PO2 Lejay Gumandal nga diha sa pagkahitabo isunod nga ipailawom sa maong test.

Ang pamilya sa mga namatay nga polis nangayo og hustisya sa kamatayon sa duha ug dili motuong tungod lang sa gamay nga panaglalis bahin sa ‘assignment’ magpinatyanay na silang duha.

Duna say pagduda ang medico legal nga si Dr. Nestor Satur human niya ma-awtopsiya ang mga patay’ng lawas tungod kay daw dili mahaom sa mga gibuhiang pamahayag sa mga testigo ang inagian sa mga bala diha sa mga lawas sa manag-agaw. Samtang gipaabot pa usab ang resulta sa ballistics examination sa mga armas sa mga polis nga diha sa pagkahitabo.

Matud pa ni SPO1 Ruth Violango,  usa sa mga imbestigador sa Homicide Section ilang gihimo ang re-enactment kagahapon aron sutaon kun nagpinusilay gyud ang duha ka polis.

“We are doing re-enactment to know the real story, para atleast makahibaw gyud ta unsa ang tinuod,” pasabot pa ni Violango.

Ang hepe sa kapolisan sa dakbayan sa Sugbo, Sr. Supt Mariano Natuel mibutyag nga sa ilang teorya, posibling si Gabutan gi-unhan og pusil ni Gonzales mas  kini og daghang igo sa lawas ilabi na sa iyang tampihak ug tangkugo.

Gipasalig usab ni Natuel nga mopatim-aw gayud ang kamatuoran ug hustisya sa nahitabo sa duha ka polis.

“Rest assured nga kun unsa man gyud ang nahitabo, the truth will prevail, no whitewash because we are also seeking for the truth,” pasabot pa ni Natuel.

Gihangop usab ni Natuel ang pagpahigayon og lahi nga imbestigasyon sa mga sakop sa NBI aron adunay makapamatuod sa ilang gihimong imbestigasyon.

“Very welcome ang NBI, so that naa say lain nga makapamatuod sa among gihimo nga imbestigasyon,” matud pa ni Natuel. (BANAT NEWS)