Huwes gitaktak sa trabaho

CEBU, Philippines - Gitaktak sa serbisyo si Municipal Trial Court in Cities (MTCC) Judge Rosabella Tormis human siya mamatud-i nga nakahimo og daghang salaud, apil niini ang daw pagka-ignorante sa balaud.

Si Judge Tormis maoy naghupot sa MTCC Branch 4 nga anaa magbasi sa ikaupat nga andana sa Palace of Justice building, luyo sa Kapitolyo.

Matud sa tanang justices sa Supreme Court nga dili na gyud angay’ng pasayloon pa si Judge Tormis kay ingon sa wala gihapon siya maleksyon bisan makapila na gisuspenso sa lainlaing kasaypanan.

Si Chief Justice Maria Lourdes Sereno miingon nga basi sa dokumento, si Judge Tormis namatud-ang sad-an sa gross ignorance of the law, gross inefficiency ug sa uban pa nga kalapasan.

Gawas kang Judge Tormis, ang iyang clerk of court nga si Reynaldo Teves giapil ‘sab pagtaktak sa serbisyo kay namatud-an usab nga nagpabaya kini sa iyang trabaho.

Dihang gihimo ang judicial audit sa mga kawani sa Office of the Court Administrator, ilang nasayran nga wala diay magtipig si Teves og docket sa mga kaso nga napasaka sa ilang court branch. Ang hukom sa Supreme Court gi-publikar na sa official website sa labaw’ng hukmanan kagahapong adlawa. Silang duha si Judge Tormis ug ang iyang clerk of court walay madawat nga benepisyo sa korte.

Ang Supreme Court midili na usab kanila nga makatrabaho sa bisan unsa nga mga opisina sa kagamhanan.

Si Judge Tormis usa sa mga huwes kaniadto nga giimbistigar tungod sa kontrobersiya sa pagpahigayon og kasal diha sa hukmanan ug gidid-an na gani siya nga maka-kasal. Ang labing uwahi nga kaso ni Judge Tormis nagumikan sa resulta sa kalit nga judicial audit sa mga kaso nga napasaka sa iyang sala.

Ang audit team nakakaplag nga kaniadtong 2008 adunay 5,120  ka lainlaing mga kaso nga nasang-at sa iyang sala, naglakip sa 4,466 ka kaso nga kriminal ug 654 ka kaso nga civil.

Nahibaw-an nga kapin sa 3,000 ka kaso ang wala matagad ni Judge Tormis bisan og dugay na kini nga napasaka sa iyang sala.

Namatud-an sa audit team nga 11 ka kaso nga kriminal nahimoan na unta ni Tormis og desisyon apan wala niya ikapagawas sulod sa dugay’ng panahon.

Duna say duha ka kaso nga wala gyud maresolbar ni Tormis bisan og dul-an na kini sa napulo ka tuig nga napasaka sa iyang sala. Dunay 112 ka kaso nga kriminal ug 83 ka kaso nga civil nga nahuman na sa paghusay ug gisumiter na aron himoan niya’g desisyon apan wala kini mahimoi ni Tormis.

Ang rekord sa Supreme Court nagpakita nga makatulo na ka higayon nga gisuspenso si Tormis apan matud sa mga justices nga wala gihapon makat-on ang huwes.

Dunay usa ka higayon nga giisip sa Supreme Court nga ignorante sa balaud si Tormis kay gipadakop niya ang usa ka sinumbong bisan og wala pa gani kini makaatubang og husay.

Bisan og gimando na nga taktakon sa serbisyo si Tormis apan duna pay laing mga kaso nga gipasaka batok kaniya nga wala pa maresolbar sa Supreme Court.  (BANAT NEWS)