Hybrid rice ipaila pinaagi sa rice congress
CEBU, Philippines - Ipaila pag-ayo sa kagamhanan sa nasud ang kamahinungdanon sa hybrid rice kon mahalong klase sa humay alang sa dugang kalamboan sa mga mag-uuma og humay sa nasud.
Kini ang gibutyag ni Deputy Director Eduardo Quilang sa Philippine Rice Institute (Philrice) kinsa miingon nga usa sa giandam nilang programa aron sa pagpaila sa hybrid rice ug sa pagpalambo sa produksyon niini mao ang pagpahigayon sa Unang National Hybrid Rice Congress didto sa Philrice, Science City sa Muñoz, Nueva Ecija gikan sa Abril 3 hangtud Abril 5, 2013.
Matud ni Quilang nga uban sa tema nga “Bigas na Sapat, Binhing Hybrid ang Kabalikatâ€, ang maong tigom tambongan sa mga dagkong opisyal sa Department of Agriculture (DA) uban sa mga opisyal sa mga kapunongan sa mga mag-uuma og humay sa matag rehiyon sa nasud, nga maglakip sa rehiyon dinhi sa Central Visayas.
Midugang siya nga sa maong komperensya ipaila ang kamahinungdanon sa hybrid rice nga maoy sandiganan sa kagamhanan nga makab-ot ang Food Staples Sufficiency Program (FSSP) niini sugod karong tuiga. Pinaagi sa pagpanguna ni Kalihim Proceso Alaca sa DA ang pagpatuman sa FSSP maoy usa sa mga estratihiya sa administrasyong Aquino aron mapiho ang kaabunda sa bugas humay ug uban pang matang sa pagkaon sama sa saging nga sab-a, kamoteng bagon, kamoteng kahoy ug puti nga mais, dinhi sa nasud, sumala pa ni Quilang.
Gidasig usab ni Quilang ang mga mag-uuuma ug mga mamamalit og bugas sa pagpalambo sa ilang produksyon niining mahalong klase sa humay ubos sa FSSP aron labi kining mailhan dinhi sa nasud.
Miingon siya nga base sa mga pagtuon taas og 21 porsento ang ani gikan sa hybrid rice seeds itandi sa certified seeds.
Gani si Quilang nagkanayon nga usa sa tinguha sa first national hybrid rice congress mao ang pag-umol og mga panukdanan ug rekomendasyon aron labing mainila ug mapalig-on ang relasyon sa goberno ug sa mga pribadong kompaniya sa binhi. (BANAT NEWS)
- Latest
