Clean living for long life

CEBU, Philippines - Mao kini ang tambag sa usa ka veterano ngadto sa kauban niyang kasundalohan unsaon pagpataas sa kinabuhi …. clean living … limpiyo nga pagpuyo … walay mansa ang kadungganan. Wala mahilambigit sa corruption, ug husto ang pagkaon … correct diet, ug labaw sa tanan, be prayerful.

Si retired army T/Sgt Tranquilino Cabiling sa Misamis Oriental, usa sa gipasidunggan atol sa pagsaulog sa ika-116th Anniversary sa Philippine Army, diin si Presidente Noynoy Aquino maoy personal nga mitunol sa plaque of recognition ngadto sa labing tigulang nga buhing veterano sa Pilipinas. Si Cabiling nagpanuigon og 112. Abtik lang gihapon, nga sa pagkakaron nananom pa’g saging ug mga utanon.

Sa pangutana sa Inquirer unsaon pagpataas sa kinabuhi, tubag ni Cabiling: “Don’t drink alcohol. Don’t womanize (lisud ni), Do not forget to pray to God. He will give you a long life.” Unya, bahin sa pagkaon, walay karne, utan, isda ug mga root crops, sama sa kamote.

Karon ra ba, ang atong mga batan-on westernized na kaayo sa pagkaon. Wala na makaila og kamunggay, kamote, ug agbati. Dili na molingi sa isda, wala na kaila unsay danggit ug  budboron. Hotdog na. Burger ug sandwich. Pakapinan pa’g sigarilyo ug ilimnon nga makahubog.

Ambut nganong wala man ni ilakip sa curriculum sa atong mga tunghaan karon? Sa atong panahon, sa subject Good Manners & Right Conduct, kanunay kitang gimaymayan sa atong mga magtutudlo bahin sa good grooming, gentlemanship, pagrespetar sa mga ginikanan ug katigulangan, good citizenship, pagtuman sa homework ug mga assignments, paglikay sa panigarilyo ug paghuboghubog, ug uban pang sumbanan sa maayong pamatasan.

Si Cabiling natawo sa Hulyo 6, 1900 sa Albuera, Leyte. Sa panuigon nga 24, mi-join sa United States Army Forces in the Far East (USAFFE). “Gunner” siya panahon sa ikaduhang gubat sa kalibutan didto sa Albuera. Iyang labaw sa artillery division, si Gen. Douglas MacArthur, ug nakasaksi siya sa MacArthur’s landing sa Leyte sa 1944.

Mi-survive siya sa Death March. Ug nakadawat og Certificate of Gratitude gikan ni kanhi U.S. President Harry S. Truman niadtong Dec. 31, 1944 sa Washington D.C.

Ngilngig no? Haom kaayo ang pasidungog nga gihatag ngadto kaniya, gawas sa iyang  pagka-122 years old. Kita, unsa man?

In the meantime, paminaw kanunay sa Senior Citizens Hour sa dyRC, 648 kHz matag Sabado, 4:00-6:00pm. Tels. 4125249, 4125298. (BANAT NEWS)