PHILSCA milusad og skills training

CEBU, Philippines -  Gilusad sa Philippine State College of Aeronautics sa Mactan Benito Ebuen Air Base o PHILSCA-MBEAB ang laing hugna sa 15 ka adlaw nga “Community Extension Service and Skills Training Program” inabagan sa mga opisyales sa Brgy. Pajo dakbayan sa Lapulapu sa milabay’ng Domingo.

Si Dr. Bernard Ramirez, ang Presidente sa PHILSCA maoy nangunay sa pagsugod sa maong programa sulod sa Mactan Air Base Campus uban ni Dr. Nonadel Soriano ang PHILSCA Campus Director ug Pajo Brgy. Konsehal Amil Tryvilla.   Gibanabanang   kapin sa 200 ka mga tinun-an  nga  kasagaran  mga out of school youth ug mga kababayen-an sa barangay Pajo ang naningkamot  pagpahimulos   sa libreng training sa basic electronic and radio repair, welding, computer literacy, basic electricity ug food processing nga gitanyag sa maong tunghaan atol sa 15 ka adlaw nga pagbansaybansay.           Matod pa ni Dr. Ramirez  nga mao kini ang ika unom na ka higayon sa pagpahigayon   nila  og skills training program sa PhilsCA Mactan  nga  gihimo matag bakasyon alang sa mga out of school youth aron  sila  mahatagan og kahigayonan nga makabaton og kahibalo sa nagkalainlaing matang  trabahong  hiantigohan alang sa kalambuan sa ilang panginabuhi.      

Samtang nunot sa pagsaulog sa “Womens Month” gidasig usab ni Dr. Soriano ang mga kababayen-an nga mopahimulos  sa ilang  gitanyag  nga food processing training aron kini makaabag sa ilang panginabuhian kung sila  gusto nga magkinaugalingon og  negosyo.       

Ang mga molampus sa maong training hatagan og sertipiko nga magamit sa pagpangita og trabaho base sa ilang training nga gisudlan.

Gani pipila na ka mga tinun-an niini ang nakatrabaho na sa mga kompaniya sa MEPZ ug ang uban mipadayon sa ilang pagtungha ug karon nagmalampuson na sa ilang trabaho sa gawas sa nasud.       

Matud pa ni Dr. Ramirez   nga magpadayon kining maong programa sa PHILSCA sa pagtabang sa mga kabataan nga dili makasarang sa paggasto pagpaeskuwela sa kolehiyo tungod  sa kakabus. Ang maong  kalihokan  gitambongan  usab  ni  Engr. Dianito Yonque, ang Campus Director sa PHILSCA Lipa City ug Dr. Michael Molejon ang PHILSCA Director for Auxillary Services.

Ang nakapahimulos  ning maong programa mao ang barangay Pajo, Babag, Punta Engaño dakbayan sa Lapulapu ug Brgy. Day-as   sa lungsod sa Cordova diin kasagaran sa mga tinun-an aduna nay trabaho.  (BANAT NEWS)