Kampanyang pamolitika sa Huwebes ug Biyernes Santo gidili
CEBU, Philippines - Higpit nga gipasidaan sa Commission on Elections (COMELEC) sa mga kandidato nga gidili ang pangampanya sa Huwebes Santo ug Biyernes Santo.
Ang maong pasidaan gihimo ni Assistant Regional Director Atty. Efraim Q. Bag-id sa Comelec 7 atol sa dili pa dugay nga Talakayan Sa Isyung Pulis (TSIP) forum sa Police Regional Office (PRO)7 Headquarters sa Camp Sergio Osmeña Sr. sa dalan Osmeña Boulevard, dakbayan sa Sugbo.
Matud pa ni Bag-id nga daan na nga nasayud ang mga kandidato bahin sa Secion 5 sa Republic Act 7166 nga mopahamtang og bug-at nga silot batok niadtong malapason.
Sa Huwebes Santo ug Biyernes Santo, daghan kaayong mga kalihokan sa katawhan sa maong mga adlaw nga sayon kaayong motintal sa mga kandidato aron makalapas sa balaod sa Comelec.
Busa matud pa ni Bag-id nga angay nga magbantay ang maong mga kandidato tungod kay ang ilang kaatbang sayon ra kaayong mogama og sumbong batok kanila.
Matud niya nga ang Comelec igo lang mopakanaog sa hustisya bahin sa madawat nilang sumbong, apan ipatigbabaw niini ang kaangayan pinaagi sa pagpangayo og ebidensya sa kihante.
Kun kamapatud-an sa kihante ang iyang sumbong pinaagi sa mga saksi ug mga ebidensya nga ikapresentar niini batok sa sinumbong, way laing mahimo ang Comelec kundi ang pagpatuman sa gimbut-an, sa balaod.
Samtang gipahinumdom ni Bag-id ang pag-uswag ngadto sa Marso 30 sa campaign period sa mga local nga kandidato imbis Marso 29 sumala sa una na nga gipahibawo sa Comelec.
Kini tungod kay matud pa ni Bag-id nga angay respetohan sa tanan ang Biyernes Santo nga natunong sa Marso 29.
Sa Marso 30, nga usa ka adlaw’ng Sabado, bukas ang buhatan sa Comelec sa pagdawat sa mga hangyo ug yangongo sa mga katawhan o kaha mga kandidato nga may buot sutaon sa ilang opisina. (BANAT NEWS)
- Latest
