Usa sa nadakpang gun-for-hire nagsige og sunod-sunod kang Mayor Alegado - Garbo

CEBU, Philippines -Guns-for-hire sa Consolacion gikompirmar sa kapolisan nga gikuptan og politiko ug posibleng gamiton sila sa umaabot nga piniliay, gani usa sa nadakpang suspek giingong nagsunod-sunod sa usa ka  mayor kaniadto.

Niadtong Biyernes nadakpan ang tulo ka mga gitumbok nga mga ‘freelance’ guns- for- hire nga silang Elmer Isoc, Norman Colina ug anak niini nga si Nico sa lungsod sa Consolacion.

Sila gilambigit nga responsable sa pagpatay kang Ramil Apa kinsa suspek usab sa pagpatay kang PO3 Alfred Datu niadtong bulan sa Pebrero 12 ning tuiga diha sa barangay Pulangbato sa Cebu City.

Si Police Regional Office director, Chief Supt. Marcelo Garbo Jr. mipadayag nga sa ilang nagpadayung tactical interrogation ilang nasayran nga si Isoc diay ang giingong nagpunay og sunod ni Consolacion Mayor Teresa Alegado tungod kay gikatahong mao unta kini ang iyang target.

Si Alegado matud pa ni Garbo, mireklamo tungod kay adunay hulga sa iyang kinabuhi tungod sa pagpunay og sunod sa usa ka tawo. Si Isoc nakuhaan og kalibre .357 rebolber.

“Nagiging realistic and fear unya and true enough may .357 revolver ang accosted guy who was trying to survey the activities of Alegado,” pasabot pa ni Garbo.

Gisubay usab ang kalambigitan sa ‘narco-politics’ human nila mahibaw-ing gawas nga “hired guns” ang mga grupo nalambigit usab sila sa illegal drug activities.

Samtang ang hepe sa kapolisan sa City Intelligence Branch Chief Insp. Romeo Santander mibutyag nga dunay target nga polis si Isoc.

Sa laing bahin, si Francisco Ariva kinsa gitumbok usab nga lider sa laing grupo sa mga guns-for-hire sa Polpogan miangkon nga iya ang mga armas apan pangdepensa lang niya kini tungod kay iyang gikabingkil ang grupo ni Bebot Pepito nga usa gihapon ka lider sa laing grupo sa mga guns-for-hire ug nalambigit sa ilegal nga drugas nga nagbase sa Liloan.

Matod pa sa hepe sa kapolisan sa Provincial Intelligence Branch Supt. Rodolfo Albotra dihang nahinabi sa Banat News nga gawas sa mga krimeng giangkon ni Ariva, dunay mga polis nga gibutyag ang suspek nga ilang kakunsabo sa ilang mga ilegal nga kalihokan.   (BANAT NEWS)