PAF may tulo na ka C-130

CEBU, Philippines - Tulo  na  karon  ang   C-130   nga abyon   sa Philippine Air Force (PAF)   human  iuli  sa  kagamhanan sa Estados Unidos   ang duha  nga  gi-repair  didto  sa maong  nasud.

Mao  kini  ang  gibutyag  ni PAF Maj. General Roy Deveraturda, ang 2nd Air Division Commander  sa PAF sa Mactan Benito Ebuen Air Base sa dakbayan sa Lapulapu atol sa Graduation Ball ug Ring Hop ceremony sa graduating class sa Philippine State College of Aeronautics PHILSCA-MBEAB Campus didto sa Radisson Blu Hotel dakbayan sa Sugbo.

Gumikan niini  gituohan  nga  dali na unya sa  PAF ang paghakot sa mga hinabang  ngadto   sa mga nabiktima sa kalamidad sama sa nahitabo sa Mindanao atol sa bagyong Pablo diin ang maong abyon maoy gigamit sa paghakot sa mga “relief goods”.

Lakip na ang pagbalhin sa “Taklobo” (sea clamps) gikan sa San Fernando, La Union ngadto na sa lalawigan sa Bohol  nga  gikarga  usab og  C-130.

Matud pa ni Maj. Deveraturda   nga laing dugang C-130 ang paliton sa gobiyerno  aron  magamit   sa armadong kusog sa nasud.

 Kahinumdoman nga sa milabay’ng tuig usa na lang ka C-130 ang nagamit sa PAF human  mahagsa   ang  usa niini   didto sa Davao sa milabay’ng tuig 2007 nga mikalas ug siyam ka kinabuhi  uban  sa piloto og mga crew niini. (BANAT NEWS)