Nasunog nga eskuylahan patukoran og bag-o
CEBU, Philippines - Pagkaugdaw sa mga classroom diha sa Candulawan Elementary School sa barangay Candulawan, dakbayan sa Talisay makaapekto sa klase kung dili dayon kini matukoran og laing mga classrooms. Kahinumduman nga walo ka mga classroom sa elementarya ug duha sa high school ang nangaugdaw ug laing usa ka partially burned sa nahitabong sunog diha sa Candulawan Elementary School niadtong Sabado sa hapon human sa gipahigayong commencement exercise sa maong tunghaan.
Hinuon bisan pa og nangaugdaw ang mga classroom nianang pagkahapon gipahigayon gihapon ang graduation ceremony sa maong tunghaan.
Si Talisay City Administrator Richel Bacaltos nga nahinabi sa Banat News kagahapon nagkanayon nga maayo na lang kay mosirado na ang klase dihang nahitabo ang sunog. Apan ang pagkaugdaw sa mga classroom makahatag gyud kini og apekto sa pagbukas sa klase sa Hunyo kung dili kini mailisan dayon.
Matud niya nga human sa Semana Santa ang Local School Board magtigom kini ug hisgutan ang maong problema.
Ang kagamhanan sa siyudad nanghinaot nga ang Department of Education (DepEd) dunay mahatag nga tabang sa pagpatukod og laing mga classrooms.
Ang kagamhanan sa siyudad andam nga mohatag og hinabang sa katukoran sa laing mga classrooms apan matud ni Bacaltos nga susihon una nila ang sitwasyon kung wala ba sila’y mahimong kalapasan tungod kay naatol kini sa election ban.
Si Bacaltos midugang nga ipasusi usab sa city engineering office ang ubang mga building sa tunghaan nga wala masunog pagsiguro kung wala ba kini magabok tungod sa kainit sa kayo dihang miulbo ang sunog. (BANAT NEWS)
- Latest
