Palma: Kaparian dili muapil sa Prolife National Rally

CEBU, Philippines - Ang labing dakong opisyal sa  simbahang katoliko sa nasud miklaro nga dili sila moapil sa umaabot nga national Pro-Life rally sa Abril 13, usa ka buwan sa dili pa ang piniliay.

Si Catholic Bishops Conference of the Philippines (CBCP) president ug Cebu Archbishop Jose Palma namulong nga dili sila mangilabot sa kalihukan sa mga layko may kalabutan sa eleksyon.

“The CBCP will not meet and discuss about it. It is an activity of the lay people and we respect that they are free to discern especially on the coming elections,” si Palma miingon.

Mipasabot siya nga gawasnon ang mga layko sa pagpadayag sa ilang opinyon apan ang mga kaparian nagkasabot nga dili siya musalmot niini aron magpabiling balanse ang  baruganan sa simbahan.

Kahinumduman nga gipahibalo  ang usa ka nasudnong rally nga pangulohan sa Pro-Life group nga naglangkob sa mga laykong lumilihok sa Simbahang Katoliko kinsa aktibong mokampanya kabahin sa isyu sa Reproductive Health (RH) Law.

Ang maong pundok mokampanya batok sa mga kandidato nga miduso sa RH ug mo-endorsar niadtong wa mo-uyon sa maong balaud nga mitay-og sa nasud sa niaging tuig dihang gipirmahan ni Presidente Benigno Aquino. (BANAT NEWS)