Lim gipasakaan na’g kaso

CEBU, Philippines - Ang usa  ka suspetsadong  masiao financier nga gibanhigan angol  sa miaging semana gipasakaan  na  og  kaso   sa Cebu City Police Office kalabot  sa mga pakete sa shabu ug mga drug paraphernalia nga gikatahong nasakmit gikan sa iyang sakyanan.

Ang hepe sa CCPO Cebu Intelligence Branch nga si Chief Insp. Romeo Santander  mibutyag  nga   kasong paglapas sa Section 11 ug 12 sa Republic Act 9165 ang ilang gipasaka sa Cebu City Prosecutor’s Office kagahapon batok kang Edgar Ho Lim.

“Actually we had a case conference with the Homicide Section and the Crime Laboratory (kagahapon) and we decided to file a case against Lim,” matud pa ni Santander. Positibo, matud pa, nga shabu ang ilang narekober sa BMW ni Lim.

Si Lim, 49, ang anaa pa karon sa tambalanan nagpaalim sa mga samad pinusilan sa iyang tiyan ug tuong bahin sa nawong nga iyang nahiaguman   dihang usa ka wa hiilhing lalaki ang mirakrak  sa iyang  BMW  nga sakyanan  didto  sa  SRP  sa miaging Huwebes sa hapon.

Sama sa wala na’y interest si Lim nga mosalmot  sa imbestigasyon o mokiha sa kapolisan ug gani  mi-file  na  kini  og  waiver   samtang  gipakuha  na  niini  ang  iyang  BMW  nga didto  sa buhatan  sa CCPO kansang  lawas  nabulit  sa  mga  buslot  sa mga bala  nga  girapido  niini  ug  didto  usab  mapalgi  sulod  niini  ang  mga  pinaketeng  shabu  ug  drug paraphernalia, matud  pa  ni Santander.

Si Santander miingon  nga gitutokan nila  karon  ang isyu  bahin  sa giingong  kalambigitan  ni Lim  sa operasyon  sa illegal  nga  sugal  nga masiao  nga  maoy  motibo  sa pagbanhig  kaniya. Sa  sayo pa giingong  mga  vigilantes  ang  mibanhig  kang  Lim  kinsa  nagplano  nga  pamatyon  ang  mga  tawong  financier  sa masiao  ug  swertres  dinhi  sa Sugbo, apan  dali  nga gipanghimakak  sa kapolisan  ang  maong  isyu.

Ang  mga tigpaniid  nagkanayon  nga  kun  puohon  sa  mga  vigilantes  ang mga financier  sa illegal  nga sugal, wa diay  silay plano  sa paghipos  sa  mga  illegal  drug  dealer? (BANAT NEWS)