Ginang natulisan og P15 mil

CEBU, Philippines - Mikabat  sa P15 mil  ang  kantidad  sa salapi  nga  nasakiyo  sa  wala  hiilhing  armadong  tawo nga mitulis sa  usa ka ginang  didto  sa  barangay Candugay sa lungsod sa Barili   sa miaging  kaadlawon.

Ang biktima mao si Cristina Nemenio, 33, minyo, nga  molupyo  sa   maong lugar, kinsa  may  duha  pa ka  gagmay’ng  mga anak, samtang ang  bana  niini  nagtrabaho  sa gawas isip OFW. Si PO2 Gilbert Encabo sa Barili Police  Station mibutyag  sa Banat News   nga ang tulisan naghupo -hupo nang daan sa gawas sa pinuy-anan sa biktima.

Dihang mimata  ang  biktima  sa kaadlawon, migawas  kini  ug   nagsawod  og tubig sa gripo nga nahimutang sa  gawas   sa iyang  balay   dihang  kalit  kining  giduol  sa tulisan   dayon gisap-ongan  ang  baba  dungan ang pagtion og armas  de fuego ug mideklarar  nga tulis.

Unya  giguyod  kini  ngadto  sa sulod  sa iyang  balay ug didto gimanduan pagkuha sa kwarta niini.

Tungod  sa  kahadlok nga patyon, wala  kini  moreklamo ug  gihatag  ang  P15 mil  nga bag-ohay  pa niyang  nadawat  gikan sa  iyang bana nga nagtrabaho sa gawas.

Ang   biktima  wala  gayud  makaila  sa dagway  sa tulisan  tungod  kay  nagtaptap kini  og senina  nga  puti sa  iyang  nawong .

Hinuon naklaro niya  ang  t-shirt niini  nga  kolor yellow  ug blue nga  may litra  nga Honda  ug yellow usab  ang   kolor  sa short  pants  niini.

Human  madawat  ang  kuwarta, dali kaayong  nakapahilayo  sa maong  lugar  ang  tulisan  ug  walay  nahimo  ang  biktima  gawas  sa pagsumbong  sa kapolisan sa iyang  gidangatan.

Padayon  pang  gipanid-an  karon  sa kapolisan ang  maong  tulisan. (BANAT NEWS)