Pasundayag sa Buhing kalbaryo madayon — Rama

CEBU, Philippines - Gipasalig ni Mayor Michael Rama nga madayon gayud ang pagpahigayon sa Buhing Kalbaryo karong Biyernes Santo sunod semana bisan og wala aprobahi ang budget sa maong kalihukan.

Ang Cebu City Council wala pa gayud moaprobar sa pagasto og P475,000 alang sa pagpahigayon sa Buhing Kalbaryo kay wala pa makaduso sa dukomento nga gipangayo sa konseho ang Accounting Department. Atol sa sesyon sa mga konsehal kagahapon wala madiskuter ang maong isyu kay pakyas pa ang accounting department pagsumiter sa gipangayong dukomento.

Gusto nga sutaon sa mga konsehal kun mahimo ba nga gastohon ang Pagcor Funds sa dakbayan sa Sugbo alang sa relihiyoso nga kalihukan sama sa Buhing Kalbaryo.

Si Konsehal Margarita “Margot” Osmeña nga maoy chairman sa Committee on Budget and Finance miingon nga gusto lang sila nga maniguro kay ang relihiyoso nga kalihukan wala maapil sa gilatid nga lagda sa Pagcor nga gastohan sa ilang donasyon sa dakbayan.

Matag buwan ang Pagcor maghatag og P3 ka milyon ka pesos sa dakbayan isip bahin sa kita pag-operate sa Philippine Amusement and Gaming Corporation ug gambling Casino sa Sugbo. Si Osmeña nangatarungan nga dili pamolitika ang ilang gihimo sa konseho nga wala pag-aprobar sa budget kay apil gani nga wala pa maaprobahi mao ang budget nga alang sa Buwad Festival.

Apan si Rama misaway sa mga konsehal nga matud niya klaro kaayo nga milangan-langan sa pag-aprobar sa gipangayo nga budget alang sa buhing paghulagway sa pag-antos ni Jesukristo sa wala pa kini ilansang sa krus. (BANAT NEWS)