NIA7 migahin og P2 bilyones para irigasyon

CEBU, Philippines - Ang National Irrigation Administration (NIA)7 migahin og dul-an  P2 bilyones alang  sa  mga proyekto  sa irigasyon  sa  Central Visayas.

Ang  maong  pundo gamiton  alang  sa pagpaayo  sa mga  gubaon  nga  mga  sistema  sa irigasyon, pagtukod  og bag-o  nga  kahimanan  alang niini ug  uban  pa.

Kining  tanan gibase  sa rekomendasyon  sa lokal  nga  kagamhanan, organisasyon  sa katawhan  ug  sa  mga asosasyon  sa mga  nakapahimus  na sa sistema  sa irigasyon

Gipresentar  na  kini  sa mga kadagkoan sa NIA7  ngadto  sa  mga  opisyal  sa Regional Development  Council (RDC)7 kinsa  maoy  gitugyanan  sa nasudnong  kagamhanan sa paghashas  sa  mga  dagkong proyekto  nga  ipatuman  sa rehiyon.

Si IDC Chairman Emmanuel Rabacal sa RDC7 nagkanayon  nga  hisgutan  pa  kining  maong  budget  sa  miting  sa tanang  opisyal  sa RDC  sa katapusang  semana  sa Marso  ning tuiga.

Sumala  sa gilatid  sa maong budget 60 porsento  niini  alang  sa  sistema sa irigasyon  sa  lalawigan  sa Bohol.

Sa  Negros Oriental  gahinan  og P396 milyones; Cebu  P190.3 milyones; ug Siquijor P16.5 milyones.

Hinuon  giendosar  na  ni  Rabacal  ang  maong  gisugyot  nga  budget sa NIA7 aron tukion unya sa  full council meeting  sa RDC7. Kun  kaaprobahan  kini  sa NIA7 anha  na  mohatag  og  pundo  ang  Department  of Budget  and  Management (DBM) alang s1a maong  katuyoan. (BANAT NEWS)