VM Bucao nangayo’g report bahin sa donasyon sa MV Majuro
CEBU, Philippines - Ang chairman sa committee on environment sa konseho sa dakbayan sa Talisay nga si konsehal Bernard Joseph Odilao gimanduan ni Bise Mayor Alan Bucao sa pagsumitir og committee report kabahin sa $10,000 nga kwarta nga donasyon sa MV Majuro.
Kini human si Konsehal Danny Caballero sa oposisyon atol sa ilang regular session kagahapon sa buntag mituki kabahin sa maong kwarta nganong wala pa ma-rehabilitate ang Lagundi Reef sa barangay Poblacion.
Kahinumduman nga niadtong Oktubre 2011 ang konseho miaproba sa gipalabang nga resolusyon ni Odilao kabahin sa pag-release sa maong kwarta aron magamit sa pag-rehabilitate sa Lagundi Reef, Makatol ug Pungaton Reef sa barangay Pooc ug Tanke.
Ang maong kwarta nga naa karon sa trust fund sa Talisay gihatag kini sa kapitan sa MV Majuro nga si Chen Guangming ngadto sa kagamhanan sa siyudad niadtong Marso 2009 aron magamit sa rehabilitasyon sa Lagundi Reef.
Kahinumduman usab nga upat ka tuig na ang nakalabay dihang ang MV Majuro misangad diha sa Lagundi Reef ug miguba sa mga gasang diha sa maong lugar.
Si Caballero mikwestiyon kagahapon kung nganong wala pa gamita ang kwarta sa pag-rehabilitate sa Lagundi ug wala pa usab kini butangi og marker lakip na ang ubang mga coral reef sa siyudad timailhan nga mga protected area kini.
Si Caballero nagkanayon nga wala siya’y nakitang aksiyon nga maprotektahan ang maong mga marine protected area ug delikado kaayo kini nga masudlan og mga lokal o commercial nga mananagat o ba kaha masangaran na usab og laing barko. Matud usab ni Caballero nga sa naobserbahan niya ngadto sa ubang mga lugar nga iyang nasuroyan higpit kaayo ang pagprotekta sa mga coral reef apan sa Talisay bisan usa ka boya wala siyay nakita nga gibutang diha sa mga coral reef nga unta duna na may budget alang niini.
Si Odilao sa iyang bahin, mihimakak kini sa pasangil ni Caballero.
Matud ni Odilao nga gihatagan niya og pagtagad ang mga coral reef ug gani dunay temporaryong floaters nga gibutang diha sa Lagundi Reef apan naanod kini tungod sa sulog sa dagat. (BANAT NEWS)
- Latest
