12 anyos nga bata nadasmagan patay

CEBU, Philippines - Patay ang 12-anyos nga batang lalaki human kini aksidenteng nabanggaan sa Isuzu trooper nga sakyanan niadtong Lunes sa gabii diha sa Cebu South Coastal Road, habig sa sitio Kimba, barangay San Roque, dakbayan sa Talisay.

Ang biktimang si John Larry Talabo, residente sa maong dapit kinsa nakaangkon og grabeng kadaot sa iyang lawas tungod sa maong aksidente patay nang nadangat ngadto sa Talisay City District Hospital.

Ang drayber sa Isuzu trooper nga nagtangag sa plakang YDU-300 nga si Philip Joseph Pasaol, 19, taga lungsod sa Borbon milahos kini ngadto sa iyang boarding house diha sa barangay Mambaling, dakbayan sa Sugbo ug nanawag sa iyang amahan ug misumbong sa maong hitabo.

Si PO1 Daniel Cabatas sa traffic division nga nahinabi sa Banat News kagahapon nagkanayon nga sa imbestigasyon ni SPO1 Nestor Canlobo nga ang amahan na ni Pasaol ang nanawag sa Mobile Patrol Group sa dakbayan sa Sugbo. Si Pasaol diha misurender sa MPG ug gitugyan usab siya ngadto sa traffic division sa Talisay ug gidetener sa Talisay City detention cell.

Giingong si Pasaol wala mohunong human niya mabanggai ang bata tungod sa kahadlok nga tabangan unya siya og kulata sa mga estambay diha sa lugar.

Sa imbestigasyon ni Canlobo nga sa wala pa mahitabo ang aksidente si Pasaol nagbiyahe kini gikan sa habagatan paingon ngadto sa dakbayan sa Sugbo dihang ang biktima kalit lang kining mitabok diha sa lugar nga nahitabo  hinungdan nga nabanggaan kini.

Matud usab ni Cabatas nga giingong ang biktima uban kini sa iyang manghod nga batang lalaki nga moapas sa ilang inahan nga vendor diha sa gawas sa usa ka department store sa lugar.

Ang manghod sa biktima giingong misulti kini sa iyang maguwang nga dili una patabokon diha sa karsada tungod kay dunay sakyanang nagpaingon.

Giingong ang biktima mitabok gyud kini ug maayo kay wala maigo sa unang sakyanan nga nagdulong apan nabanggaan na kini sa ikaduhang sakyanan nga gimaneho ni Pasaol. (WC)(BANAT NEWS)