Mga armas nasakmit

CEBU, Philippines - Upat ka tawo ang nasikop ug mokabat ngadto sa P400,000 ang kantidad sa armas ang nakuha sa joint operation nga gipahigayon sa  Regional Intelligence Branch (RID)-7 ug sa Regional Special Operation Group (RSOG) batok sa illegal nga armas sa dakbayan sa Toledo.

Armado og duha ka search warrant sa illegal possession of firearms nga giluwatan ni Regional Trial Court Judge Hermes Montero sa Branch 59 sa Toledo City batok kang Roldan Paragaso Cansancio.

Apan pakyas ang operatiba sa pagsikop ni Cansancio kinsa giingong usa ka opisyal sa usa ka union sa mga mamumuo.

Gidakop hinuon sa kapolisan sila si Richie Suarez, 33, taga San Carlos City ug Lucio Yuson, 23, taga Villahermoso, parehong taga Negros Oriental lakip na ni Cesar Paragoso Sr., 70, taga Barangay Don Andres Soriano, dakbayan sa Toledo, diha sa Dubay Beach Resort sa Barangay Dumlog, nga gipanag-iya ni Cansancio, mga alas 11:45 sa gabii adtong Lunes.

 Nakuha sa operatiba gikan kanila ang usa ka M14 rifle caliber 7.62mm;  usa ka 12- gauge shotgun; usa ka Thompson sub-machine pistol; usa ka Colt M4 A1 Carbine 5.56mm rifle; usa ka Norinco 9mm pistol; usa ka Smith & Wesson .357 revolver;  usa ka .38 revolver;  hand grenade; ug daghang mga bala ug magazines sa maong mga armas.

Nakuha usab ang usa ka police auxiliary ID nga adunay ngalan nga Alberto Ducor; ug usa ka itom nga bag. Matud ni Chief Insp. George Ylanan, hepe sa RSOG, ang operasyon gihimo tungod sa mga reklamo sa mga mananagat sa pagsigeng pagpanghulga kanila sa mga suspek.

“Nag-guard ni sila (suspects) sa resort carrying high-powered firearms and if somebody would go near to the resort suspects would fire to scare them (mananagat) away,” matud ni Ylanan.

Pipila ka minutos ang nakalabay, gironda sa kapolisan ang balay ni Cansancio sa Sitio Anislag, Barangay Canlumampao, apan pakyas gihapon sila sa pagsikop niini.

Nasikop hinuon ang usa ka Joy Laspuña, 40, taga San Carlos City, Negros Occidental.

Nakuha gikan kaniya ang usa ka .45 STI pistol, duha ka magazines niini, walo ka bala sa .45 pistol, 40 ka bala sa 5.56mm rifle, ug usa ka taas nga magazine sa M16. Ang mga armas ipadala kini sa Philippine National Police Crime Laboratory-7 sa Camp Sotero Cabahug alang sa cross matching aron sa pagsuta kung nagamit kini sa krimen.

Si Sr. Supt. Edward Carranza, PRO-7 chief of staff, nagkanayon nga si Cansancio giingong responsable sa pagpusil patay kang Rene Embralinag, 42, Barangay Captain Claudio, adtong Pebrero 22 sa Barangay Luray II.

Si Embralinag, security ni kanhi Senador John Henry “Sonny” Osmeña, giingong apil sa certification election sa labor union sa Carmen Copper Corporation diin si Cansancio usa sa kanhi opisyal sa maong union.

Ang kamatayon ni Embralinag nakapakurat ni Osmeña. Si Embralinag nakaangkon og daghang samad pinusilan sa lawas hinungdan sa kamatayon niini.

Nagmaneho siya sa iyang motorsiklo paingon sa Barangay Poblacion gikan sa Cebu Electric Cooperative (CEBECO) Incorporated human magbayad sa kuryente niini dihang gipusil sa duha ka wala mailhing tawo.

Si Carranza midugang nga ang maong grupo nalambigit isip guns-for-hire hinugdan nga iapil kini sa Private Armed Group (PAGs).

Mohimo og verification ang operatiba kung aduna bay nagpaluyo nga politiko sa grupo. (BANAT NEWS)