Pundo sa tag P4K sa senior citizens hanap pa

CEBU, Philippines - Dili pa sigurado nga tag P4,000 gyud ang madawat nga cash assistance sa mga senior citizens karong sunod semana.

Si city treasurer Emma Villarete dili mopirma sa maong kantidad kay wala pa’y budget nga magamit nga moabot og duha ka milyon ka pesos.

Matud ni Villarete nga ang kwarta nga anaa karon sa banko, sobra nga ipanghatag sa cash assistance alang sa mga senior apan dili kini magamit kay duna nay ubang gastohan nga gitagan-an niini.

Ang Filinvest Land Incorporated (FLI) bag-ohay pa lang mibayad og P234 milyones nga katapusan niining bayranan sa dakbayan pagpalit nila sa 10.6 hektaryas nga yuta sa SRP.

Apan ang maong salapi gitagana na sa ubang gastohanan nga gilatid sa annual budget.

Si Mayor Michael Rama miingon nga pakigtagboan niya ang iyang mga sinaligan sama ni City Administrator Jose Marie Poblete, City Treasurer Villarete, City Accountant Diwa Cuevas aron tukion ang maong problema.

Gitataw hinoon ni Rama nga ang maong isyu sa kakuwang sa budget dili makapausab sa petsa sa pagpanghatag sa cash assistance karong Marso 26 ug 27.

Ang problema sa kakuwang og budget nga magamit paghatag og tag P4,000 karong buwana, makapasamot sa pagtoo nga dili gyud mahimo sa dakbayan ang plano niining paghatag og cash assistance sa mga senior sa matag buwan.

Ang konseho miaprobar og ordinansa nga nag-awhag sa mayor nga binuwan na ang paghatag sa cash assistance sa mga senior, apan si Rama daan nang miingon nga di siya mosanong niini. (BANAT NEWS)