PWDs mireklamong wa hatagi og discount ug gibugal-bugalan pa gyud sa restaurant
CEBU, Philippines - Nagpatabang sa Commission on Human Rights ug Department of Social Welfare and Social Services ang usa ka grupo sa mga deaf mute aron pasakaan og kaso batok sa usa ka restaurant sa Brgy. Mabolo ning siyudad nga giingong mi-abusar sa ilang katungod.
Ang mga biktima giila nga sila si Joseph Onglatco, Roslyn Onglatco, Glenda Casas, Alyssa Binghay ug Norinne Pacubas.
Gisaysay sa mga biktima ang ilang nahiaguman pinaagi sa ilang interpreter nga si Loulene Intano.
Nangaon sila sa maong restaurant niadtong Marso 9 ug dihang gipangayo nila ang bill ug mipresentar sa ilang PWD discount ID, wala kini tahura sa waiter kay matud pa senior citizen ray ilang hatagan og discounts. Tungod niini ilang gipatawag ang manager nga ginganlan og “Fanny†apan gikatahong wala sila atubanga niini. Tungod niini napugos sila sa pagbayad kun pila gyo’y ilang bill sa nakaon.
Apan ang nakapadugang sa insulto ug kauwaw mao ang pagbugal-bugal kanila sa mga empleyado sa maong kan-anan.
Sa report sa Aksyon Bisaya News 5 kagahapon, gipasalig ni Primo Cadampog, ang supervising investigator sa CHR-7 nga tabangan nila ang mga “hearing impaired†nga mireklamo.
Matud pang Cadampog nga kun mapamatud-ang sad-an ug nagbugal-bugal ang maong kan-anan sa mga reklamante dunay silot nga nagpaabot kanila aron mahimo kining leksyon di lang kanila kung di lakip sa ubang mga establisamento sa Sugbo.
Subay sa Republic Act 9442 kon Magna Carta for Disabled Persons ang mga tawo, kompanya, establisamento ug indibidwal nga mapamatud-ang makalapas sa mga probisyon niini adunay multa nga P50,000 ngadto sa P100,000 ug pagkapriso og unom ka buwan ngadto sa duha ka tuig sa unang offense ug magkadako sa sunod pang kalapasan. (BANAT NEWS)
- Latest
