Pilipinas napili nga maayong lugar sa mga babaye

CEBU, Philippines - Agi og pagtamud sa kasaulogan sa International Women's Day, ang Philippine Commission on Women (PCW) mapasigarbohong mipahibalo nga ang Pilipinas usa sa napili nga maayong lugar alang sa kababayen-an base sa talaan sa 2012 Gender Gap Index (GGI).

Ang GGI misusi sa kal-ang tali sa kababayen-an ug kalalakin-an base sa upat ka kategoriya nga: participation & opportunity, educational attainment, health & survival ug political empowerment.

Sukad sa tuig 2006 nagpabilin ang Pilipinas lamang nga maoy nasud sa tibuok Asia nga  nahisakop sa top 10 sa maong survey.

Base sa resulta sa maong survey, 46 porsiyento sa kababayen-an ang milangkob sa ikatulong  bahin  nga  mipasar  sa career executive service board 2012.

Gawas niini ubay-ubay usab ang mga babaye ang nahimong Presidential Appointee nga naghupot og mga dagko nga katungdanan sa gobiyerno sama sa Chief Justice, Secretary of Justice ug Presidential Adviser on the Peace Process.

Sa natad sa pamuo, may 49.7 porsiyento niini ang kababayen-an, matud pa sa NSO.

Ang PCW mipasabot  nga  makab-ot lamang ang makiangayon nga kahimtang sa mga babaye kung mahatagan sila og patas nga oportunidad sa panarbaho ug masaligan nga mohupot og taas nga katungdanan sa gobiyerno.   

Mao kini ang panawagan sa PCW alang sa mga babaye atol sa pagsaulog sa Women's Month karong bulan sa Marso.

Sa laing bahin ning bag-ohay lang malampuson nga gipahigayon sa Department of Agriculture Regional Field Unit 7 (DA RFU-7) ang pagsugat sa selebrasyon sa Womens Month  nga gisalmotan  sa tanang  kawani  niini.

Atol sa maong selebrasyon may   pagpanghatag og rosas ngadto sa tanang babaye nga empleyado sa maong buhatan diin ang mga lalaki nga empleyado maoy miapud-apod sa giandam nga mga rosas.

Sumala pa ni DA-7 Regional Executive Director Angel Enriquez, nga espesyal gayud kaayo para kaniya ang maong okasyon tungod kay isip usa ka babaye maanindot gayud kun e-empower ang katungod sa mga kababayen-an.

Dugang pa ni Enriquez nga dili gayud makompleto ang usa ka lalaki  kun wala kini ikauban nga babaye sa iyang kiliran hinungdan nga iyang gidasig ang tanang mga lalaki nga kinahanglan panggaon gayud ang mga babaye ug nga dili kini pasakitan.

Gipasabot usab ni Enriquez nga kinahanglang dili lamang sa matag selebrasyon sa Womens Month ipakita sa usa ka lalaki ang iyang pagmahal ug maayong pag-atiman sa usa ka babaye kundi matag adlaw gayud aron mabati usab sa usa ka babaye kun unsa siya kabililhon sa lalaki  nga  nagmahal kaniya.

Sa maong selebrasyon may  paghalad  usab og awit  ngadto sa mga kababayen-an nga empleyado sa DA 7. (BANAT NEWS)