Wa pa ilhi ang mipusil patay sa Engr. sa Napocor

CEBU, Philippines - Nagpabilin  pa  nga wala  hiilhi  sa kapolisan  sa   dakbayan sa Lapulapu   ang nagpusil patay sa 2nd engineer sa National Power Corporation (NAPOCOR) sa miaging kaadlawon sa sulod sa usa ka kan-anan sa  dalan Lopez Jaena sa barangay Poblacion sa dakbayan sa Lapulapu.

Sa follow-up  interview  nga  gihimo sa Banat News  kang PO2 John Carlo Jocotan kagahapon, iyang gipadayag nga ang biktima nga si Engineer  Joemar Locinto, 39, minyo,   lumad nga taga Sorsogon, Albay sa Camarines Sur, dili pa dugay nga nadistino sa tug-boat sa NAPOCOR nga  nagpundo  sa daplin sa kadagatan sa Mactan Channel sa barangay Poblacion.

Matud pa niya nga ang mga kauban sa trabaho sa biktima wala usab makamatikod nga aduna kini  gikaaway nga mga tawo sa maong dapit sanglit dili pa  dugay nga nadistino kini sa Lapulapu.

Si PO2 Jocotan miingon nga sa imbestigasyon nga ilang gihimo ilang nasuta nga gikan pa   ang  biktima  sa inom   uban  sa duha  ka wala  hiilhing  babaye    sulod  sa  usa ka videoke  sa  maong dapit.

Dugang pa niya   gikan   sa videokehan  misulod  sila sa usa ka restaurant   kay  nangaon.

Unya samtang   nangaon,  kalit lang misulod ang wala hiilhing lalaki nga nagsul-ob  og wig nga buhok  ug itom nga jacket  ug gipusil ang biktima sa bukobuko.

Human  niini  misirit  dayon  pahilayo  sa maong  lugar  ang kriminal , samtang  gihatud  sa  iyang  mga  kauban  ang  biktima  ngadto  sa Vicente  Sotto Memorial Medical  Center  sa dakbayan sa Sugbo diin  kini ideklarar  nga dead on arrival  sa  mga doktor  nga  miatiman  niini. Sa pagkakaron  padayon  pang  naniid  ang  kapolisan aron pag-ila  sa kriminal. (BANAT NEWS)