Motor nalimbuwad 1 patay 1 angol

CEBU, Philippines - Namatay ang angkas   samtang  naangol ang drayber sa motorsiklo  nga  ilang  gisakyan nga  nalimbuwad didto sa highway sa barangay Talaga, lungsod sa Argao  niadtong Domingo sa alas 5:30 sa hapon.

Ang   namatay paghiabot sa tambalanan mao si Julito Niere, 48, minyo,  samtang   ang nagmaneho sa  motor nga naangol mao si Ramil Cariman, 31, ulitawo, apan dunay kapuyo   nga pulos mga canvasser og coconut lumber.

Si PO2 Renato Nacaytona sa Argao Police Station mibutyag  sa Banat News  nga  nagpaingon   ang  mga  biktima sa lungsod sa Argao aron sa pagpangita  og  mga  baligyang  punoan  sa lubi, nga  ilang  gabason  aron himoong  coco  lumber.

Apan  tungod  sa  kakusog sa dagan  sa motor, kalit  lang  mihagtos  ug  naputol  ang  kadena  niini  dayon  nawad-an  og  preno  hinungdan  nga w ala  ma-control  sa drayber  ang  dagan  sa motorsiklo  nga misangpot  sa paglimbuwad   niini sa  daplin  sa karsada  ug  nangalagpot  ang  duha  ka  biktima.

Ang  kakusog  nga  pagkapantok  sa ilang  ulo  sa sementadong  karsada  maoy hinungdan sa kamatayon  ni Niere.

Gihatud  dayon  ang  duha  ngadto  sa Isidro Kintanar Memorial Hospital sa lungsod  apan  patay  na si Niere  pag-abot  didto, samtang  si  Cariman  nahimutang  sa talandugon  nga  kahimtang.

Gisuta  pa  sa kapolisan  kun  nagsul-ob  ba  og  helmet  ang  duha  sa ilang  pagsakay   sa  motorsiklo. (BANAT NEWS)