Soco gustong mabutangan og LTO satellite office sa Camotes

CEBU, Philippines - Giawhag sa negosyanteng kandidato sa pagkabise-gobernador, Glenn Anthony Soco, ang Land Transportation Office nga mobutang og satellite office sa isla sa Camotes.

Kini human niya masayri ang problema sa mga drayber og habal-habal sa maong isla kalabot sa ilang pagkuha og lisensiya ug rehistro sa ilang mga motorsiklo.

Matud pa ni Soco nga dili angayan nga hasulon ang mga drayber sa paglabang padulong sa labing duol nga buhatan sa LTO.

Ang labing duol nga buhatan sa LTO nga madangpan sa taga isla sa Camotes anaa nahimutang sa dakbayan sa Danao.

Naglangkub sa isla sa Camotes ang mga lungsod sa Poro, Tudela, San Francisco ug Pilar nga may gibanabanang 82,424 ka mga tawo base sa 2010 census.

Si Soco nagpadayun nga nibisita sa nagkalainlaing sityo ug barangay sa lalawigan sa Sugbo sa iyang pagpangampanya aron direktang madungog ang problema sa katawhan.

Sa iyang pagbisita usab sa isla sa Camotes iyang nasayran ang kakuwang sa serbisyo sa Camotes District Hospital nga ubos sa kagamhanan sa lalawigan sa Sugbo.

Nagtinguha si Soco nga mapalambo ang serbisyo sa maong tambalanan kung hatagan siya og higayun nga modaug sa umaabot eleksiyon.Nipalabtik si Soco sa iyang kaatbang nga si acting Gob. Agnes Magpale sa wala pag-atiman sa tambalanan sulod sa dugay niyang pag-alagad isip sakop sa Hunta Probinsiyal sa ikalimang distrito diin nasakop ang isla sa Camotes. (BANAT NEWS)