Mga tinun-an sa Mandaue gisuwaya’g dagit
CEBU, Philippines - Naalarma karon ang kadagkoan sa publikong tunghaan sa dakbayan sa Mandaue tungod sa gikataho nga may mga tawo nga misuway pagdagit sa ilang mga tinun-an.
Si Department of Education (DepEd) Superintendent Virginia Zapanta sa Mandaue City School Division maoy mipahibawo kang Mayor Jonas Cortes bahin sa maong insidente.
Gumikan niini si Mayor Cortes mipagawas og orden sa kapolisan nga kinahanglang bantayan nila uban sa mga barangay tanod ang 49 ka mga tulunghaang publiko sa kabarangayan sa maong dakbayan.
SI Jamaals James Calipayan, executive secretary ni Mayor Cortes miingon nga nakadawat siya sa maong kasayuran atol sa ilang panagtigom sa mga sakop sa City Peace and Order Council (CPOC) niadtong miaging adlaw. Ang DepEd administrator nga si Benjamin Tiongzon mibutyag nga niadtong Marso 5 ning tuiga , usa ka tinun-an nga 3rd year high school sa Ibabao Estancia gisuwayan og dagit sa mga lalaki nga de motor.
Matud pa niya nga naglakaw ang maong tinun-an unya gihunongan siya og usa ka motorsiklo dayon giagda siya sa nagsakay niining duha ka wala hiilhing lalaki nga pasakyon sa ilang motor.
Niadtong Marso 11 sa alas 6:00 sa buntag duha usab ka babaye nga ilang tinun-an nga naglakaw paingon sa ilang tulunghaan kalit usab nga gihunongan og close van type nga sakyanan ug ang wala hiilhing lalaki nanaug ug nangagda nga pasakyon sila.
Ang mga tinun-an nga nahadlok mikaratel og dagan paingon sa ilang tulunghaan ug mitaho sa ilang mga kadagkoan sa eskuylahan.
“This incident shouldn’t be taken for granted and the students need to be protected,†nagkanayon si Tiongzon.
Ang maong hitabo nakapapukaw sa hunahuna ni Tiongzon ang gidangatan ni Ellah Joy Pique nga usa ka Grade 1 pupil nga gidagit sa wala hiilhing mga tawo niadtong Pebrero 8, 2011 ug napalgan na lang ang patay’ng lawas niini didto sa barangay Guimbuangan sa lungsod sa Barili. (BANAT NEWS)
- Latest
