Aboitiz mibubo’g hinabang sa taga Lapulapu

CEBU, Philippines - Ang mga programa  bahin  sa pag-atiman sa kahimsog sa panglawas ug   sa  pagpalambo  sa edukasyon sa kabataan sa kabarangayan sa dakbayan sa Lapulapu hingpit  nga gipatuman sa kagamhanan sa dakbayan sa Lapulapu.

Kini  ang gibutyag ni  Mayor Paz Radaza atol sa inauguration sa Pediatric   ug OB-Gyne ward   uban  usab  sa  pagtunol  ug  pagtakli  sa  mga katre  sa hospital  ug  mga  kasangkapan  sa Aboitiz Foundation niadtong miaging adlaw.

Matud pa ni  Radaza nga iyang  gisentro   ang  iyang  panggoberno sa pag-atiman  sa maayong  panglawas  pinaagi  sa pagpalambo sa  mga kahimanan    sa Lapulapu City Hospital  ug  pagdugang og  mga  doktor  nga  moatiman sa mga molupyo nga magpatambal sa maong tambalanan.

Mapasalamaton  kaayo  si  Radaza sa  suporta sa pribadong sector  sama sa Aboitiz Foundation nga  migahin  og  dakong  kantidad  sa salapi alang  pagdugang sa mga kahimanan sa tambalanan  sa dakbayan.

Gawas  sa pagpalambo  sa hospital mipatukod  usab  ang  Aboitiz   og duha  ka andana  nga  tulunghaan  nga  may  unom  ka  lawak  sa  Babag National High School. (/WC)  (BANAT NEWS)