Computer sa dormitoryo sa Hillyland lukata’g permiso?

CEBU, Philippines - Ang caretaker sa Cebu City Hillyland Dormitory nangatarungan nga dili kinahanglan nga kuhaan nila og business permit ang mga computer nga  ilang  gipagamit sa mga tinun-an nga dili na mogawas sa dormitoryo, ilabi na panahon sa gabii.

Matud ni Sudlon 2 Barangay Captain Dante Tabucal nga maoy gitudlo nga caretaker sa dormitoryo sa dakbayan  sa Natalio Bacalso Avenue nga dili “business” ang tumong pagbutang sa maong mga computer mao nga wala na kinahanglana ang business permit  niini.

Si Tabucal miingon nga ang pagpabayad nila og “piso-piso” sa mogamit sa computer gitumong aron mabayaran nila ang abangan  niini.

Giangkon ni Tabucal nga walay kasabotan nga gipirmahan tali sa tagdumala sa city dormitory ug sa tag-iya sa mga computer.

Matud ni Tabucal ang mga tinun-an mismo ang mihangyo sa pagbutang og mga computer aron dili na sila molakaw pa’g layo kun  magkinahanglan  sila  og  computer.

Gipaabot nga kining maong isyu dad-on ni Konsehal Margarita “Margot” Osmeña sa konseho sa dakbayan aron kahisgotan kun unsay angay’ng himoon.

Si Mayor Michael Rama miingon nga kun gikinahanglan man gani ang permit sa mga computer, angay’ng kuhaon g’yud ang maong permit ug ang kuryente niini kinahanglang dili kuhaon  gikan sa koneksyon sa dakbayan.

Nahibaw-an nga ang dormitoryo migasto og P894,681 sa bayranan  sa kuryente ug P1,116,065 sa  tubig sa kinatibuk-ang tuig 2012. (/WC)  (BANAT NEWS)